Amazon компаниясының нарықтық капитал көлемі алғаш рет 3 триллион доллардан асты

Фото: Consolline
Amazon компаниясының нарықтық капитализациясы дүйсенбі күні алғаш рет 3 триллион доллардан асып, бұл межеге жеткен әлемдегі бесінші компания атанды, деп хабарлайды turkystan.kz.

Технологиялық алпауыттың акциялары ерте сауда барысында 5,2%-ға өсіп, бір акцияның бағасы 285,75 долларға жетті. Соның нәтижесінде компанияның нарықтық құны шамамен 3,1 триллион долларды құрады.

Жыл басынан бері Amazon-ның нарықтық құны 23,2%-ға өсті, бұл көрсеткіш «Ғажайып жетілік» (Magnificent Seven) деп аталатын ірі технологиялық компаниялар тобы арасындағы ең жоғары өсім болды.

Мұндай серпіліс компанияның екінші тоқсанда бұлтты қызмет көрсету бизнесінің жасанды интеллектке деген жоғары сұраныс аясында айтарлықтай өскенін жариялағаннан кейін орын алды. Компанияның кірісі 200,61 млрд долларды құрап, сарапшылар болжаған 196,47 млрд доллардан асып түсті.

Бұған дейін Apple, Microsoft, Alphabet және Nvidia компаниялары да нарықтық капитализациясы 3 триллион доллардан асқан болатын. Қазіргі таңда Nvidia – нарықтық капитализациясы 5 триллион долларға жуықтаған әлемдегі ең қымбат компания.

Дүйсенбі күні басқа да ірі технологиялық компаниялардың акциялары өсті. Meta Platforms акциялары 4%-ға, Alphabet – 3,6%-ға, ал Oracle – 5%-ға қымбаттады.

Amazon, Microsoft, Alphabet және Meta компаниялары биыл жасанды интеллектке арналған деректерді өңдеу орталықтарына, чиптерге және есептеу инфрақұрылымына шамамен 700 млрд доллар инвестиция салуды жоспарлап отыр.

Бұған дейін Amazon сату көлемі бойынша Walmart-ты басып озып, әлемдегі ең ірі компания атанғаны хабарланған еді.

Толық нұсқасына гиперсілтеме беруді ұмытпаңыз: https://turkystan.kz/article/285979-amazon-kompaniiasynyn-naryqtyq-kapital-kolemi-algas-ret-3-trillion-dollardan-asty