Таразда халықаралық қолөнершілер көрмесі жалғасуда..

Ауқымды іс-шараның салтанатты ашылу рәсіміне Жамбыл облысының әкімі Ербол Қарашөкеев, ҚР Президентінің кеңесшісі Мәлік Отарбаев, шаһар басшысы Бақытжан Орынбеков және ҚР Парламенті Мәжілісінің депутаттары, халықаралық ұйым өкілдері, шетелдік және отандық қолөнершілер қатысты.

Ең әуелі сөз алған аймақ басшысы Тараздың терең тарихына тоқталып, көне шаһардың қолөнер мен өркениет орталығы ретіндегі рөліне ерекше мән берді.

– Екі мың жылдан астам тарихы бар қала ғасырлар бойы сан түрлі халықтарды табыстырып, өнер мен дәстүрдің үзілмес желісін қалыптастырды. 2022 жылы қаламыздың дүниежүзілік қолөнершілер қалалары тізіміне енуі – ел мерейін өсірген айтулы жетістік. Осы мәртебе – ата-бабадан аманат болған ұлттық қолөнеріміздің жаһандық деңгейде мойындалғанының айқын дәлелі, – деді Ербол Шырақпайұлы.

Келесі кезекте Мәлік Нұржанұлы фестивалдің маңыздылығына айрықша тоқталып, бірқатар қолөнер шеберлеріне Мемлекет басшысының марапатын табыстады.

Сонымен қатар ҚР Парламенті Мәжілісінің депутаты Гүлдара Нұрымова мен Дүниежүзілік қолөнершілер ұйымының мүшесі, «Қазақстан этнодизайнерлер одағы» қоғамдық бірлестігінің президенті Салтанат Жапарова ұлттық қолөнерді заманауи талаптарға бейімдеу, этнодизайнды дамыту және қолөнер индустриясын кәсіпкерлікпен ұштастыру бағытындағы маңызды бастамаларды ортаға салды.

Шара барысында мәртебелі меймандар шеберлердің туындылары қойылған көрмені тамашалап, Қолөнер және туризм орталығының жұмысымен танысты. Сонымен қатар арнайы безендірілген 10 қазақ үйдің экспозициясы көпшілік назарына ұсынылды. Әрбір киіз үй белгілі бір тақырыпқа негізделіп жасақталып, онда қазақ халқының тұрмыс-тіршілігі, музыкалық аспаптары, зергерлік өнері, киіз басу, ағаш ою, тері өңдеу секілді дәстүрлі кәсіп түрлері кеңінен таныстырылды.

Екі күнге ұласатын ауқымды фестиваль аясында шеберлік сағаттары, «Дәстүр және қазіргі заман» атты Халықаралық ғылыми-тәжірибелік конференция, гала-концерт, ұлттық киімдерінің сән көрсетілімі және сувенирлік өнімдер жәрмеңкесі ұйымдастырылады.

Биылғы фестивальге тараздық шеберлермен қатар үш мемлекеттен келген 33 қолөнерші қатысып, өз жұмыстарын ұсынуда. Бұл Тараздың халықаралық мәдени диалог алаңы ретіндегі мәртебесін нығайта түседі.

Жалпы, бұл игі шара өңірдің туристік тартымдылығын арттырып, қолөнер саласындағы кәсіпкерлікке жаңа мүмкіндік береді. Бүгінде Таразда жүздеген қолөнерші еңбек етіп, ұлттық өнердің дамуына өз үлесін қосуда. Алдағы уақытта көне шаһарды ЮНЕСКО-ның шығармашылық қалалар желісіне енгізу бағытындағы жұмыстар да жүйелі жалғасатын болады.