Ауылдарға ауызсу жетіп, «көгілдір отын» кіргізіледі

Жуалы ауданының әкімі Нарбай Ергебеков аудан халқының алдында жыл бойы атқарылған жұмыстарды тізбектеп, есеп берді. Облыс әкімі Асқар Мырзахметов қатысқан есепті жиында Нарбай Әбілқасымұлы аудандағы құрылс қарқыны туралы баяндады.

– Есепті мерзімге құрылыс жұмыстарының көлемі 5 475,1 млн. теңгені құрап отыр. 2019 жылы мемлекеттік қаражаты есебінен 1 221,5 млн. теңгеге 14 нысан құрылысы жүргізіліп пайдалануға берілді. Оның ішінде, 8 нысан мемлекеттік-жекеменшік әріптестік аясында салынды.

Жеке тұрғын үй есебінен 2019 жылы 11 079 шаршы метрді құрайтын тұрғын үйлер қабылданды. Бұл көрсеткіш 104,8 пайызға артығымен орындалды.

Келесі маңызды мәселе – ауызсумен қамту. Бүгінгі күні ауданда орталықтандырылған ауызсумен қамтылу деңгейі 32,6 пайызды құрайды. Мәселені шешу мақсатында 5 елді мекенге құрылысқа қаржы бөлініп отыр. 7 елдімекеннің жобалық-сметалық құжаттамалары дайындалып, облысқа сұраныс жасалды. 10 елдімекеннің жобалық-сметалық құжаттамалары дайындалуда. Аталған жобалар іске асқан жағдайда ауыз сумен қамту 77 пайызға жетеді деп жоспарлануда, – деген аудан басшысы газдандыру мәселесіне де кеңінен тоқталды.

Оның айтуынша, аудандағы 15 елді мекенді газдандыруға 2 976,0 млн. теңге қажет екен. Бұл қаражатқа ұзындығы 102,3 шақырымды құрайтын газ құбыры тартылады. 2019 жылы құрылыс жұмыстарына 1 365,0 млн. теңге бөлініп Қошқарата бағытына магистралды газ құбыры құрылысы жүргізіген. Осы жылы магистральді газ құбырының құрылысы  723,0 млн. теңгеге жалғасып, 2021 жылы аяқталуы жоспарланып отыр екен.

– 7 елдімекенге ауылішілік газ құбырларын жүргізуге құжаттар әзірленген. Жобаларды іске асыру үшін қаржы қарастыруды қажет етеді. Ал Билікөл ауылдық округіндегі  4 елдімекенге автоматтандырылған газ бөлу стансасының құрылысын бастау үшін республикалық бюджеттен 117,5 млн. теңге сұралған еді. Алайда аталған қаржы биылғы жылы қаралған жоқ, – деді Н. Ергебеков өз сөзінде.