«Таза Қазақстан» акциясы аясында бүгін «Қызылабад» тұрғын алқабына 5 мың ағаш отырғызылды.
Тараз қаласын көгеріштендіруге айрықша ден қойылып отыр. Осы бағыттағы ілкімді істердің нәтижесінде шаһарда жасыл желек жамылған алқаптардың қатары артып келеді. Соның жарқын дәлелі – Мемлекет басшысының тапсырмасымен бастау алған «Таза Қазақстан» акциясы аясында бүгін «Қызылабад» тұрғын алқабына 5 мың ағаш отырғызылды.
Шараға Тараз қаласының әкімі Бақытжан Орынбеков, мемлекеттік қызметшілер, ардагерлер мен белсенді жастар қатысып, акцияға өз үлестерін қосты.Қала тазалығы баршаға ортақ екенін баса айтқан шаһар басшысы жұртшылықты сенбіліктен шет қалмауға шақырды.
Жалпы биыл облыс орталығында 40 мың тал отырғызу жоспарланса, соның 20 мыңы «Жасыл белдеу» жобасы бойынша «Қызылабад» алқабына тиесілі. Айталық, 2022 жылы бұл маңға 10 мың, ал өткен жылы 20 мың тал егілген.
Бұл бағыттағы жұмыстар алдағы уақытта да жалғасын табады.