Жатақханада көз жұмған студентке қатысты тың дерек шықты (ВИДЕО)

Шымкенттегі жатақханада көз жұмған 1-курс студентіне қатысты жаңа деректер пайда болды деп хабарлады turkystan.kz КТК арнасына сілтеме жасап.

Түлкібаста 9-сыныпты бітіріп, Шымкенттегі Манап Өтебаев колледжіне оқуға түскен Нұрхат Дүйсен 22 қыркүйекке қараған жатақханада қайтыс болды.

Нұрхат отбасындағы 4 қыздың ішіндегі жалғыз ұл болған. Марқұмның туыстары аталмыш колледж ғимаратына жиналып, екі күннен бері кешірім сұрамақ түгілі, қоңырау да соқпаған колледж басшыларын жауапқа тартуды талап етіп отыр.

Анасының айтуынша, қыркүйектің бірінен бастап Шымкентке оқуға кеткен шәкірт үздіксіз ақша сұраумен болыпты. Сондықтан оған әлімжеттік көрсетілген дейді.

Нұрхат Шымкентке келгелі жанжақтан ақша сұрай бастаған. Туыстарынан, әпкелерінен сұраған. Менің ойымша одан ақша талап еткен. Қорқытқан. Маған да оны айтуға қорыққан болар, – дейді марқұмның анасы Айжан Қашағанова.

Марқұмның сауалына жауап беретін оқу орынынан бір адам табылмаған.

Колледжге білім басқармасының басшысы Жанат Тәжиева келіп, 15 адаммен арнайы комиссия құрылып зерделеу жұмысы жүргізілетінін жеткізді

Өз ісіне жауапсыздықпен қарап, бақылау жұмысын өз дәрежесінде жүргізе алмағаны үшін бірінші басшы жұмыс орнын босатқанға дейінгі қатаң жауапқа тартылатын болады, – деді Шымкент қаласы білім басқармасының басшысы Жанат Тәжиева.

Туыстары тергеуге күмәнмен қарап отыр. Себебі қылмыстық кодекстің бабын тым жеңіл деп санайды. Тіпті күдіктілер белгілі болса да, ешкімге айып тағылмаған. Сондай-ақ олар полицейлердің селқостығына да наразы. Өйткені қайғылы жағдай болғанына 2 күн өтсе де, жатақхана ішіндегі камералар әлі қаралмаған.

Полиция сот-медициналық сараптама тағайындалып, бір баппен қылмыстық іс қозғалғанын айтты. Бірақ марқұмның туыстары сараптама қорытындысы өзгеріп кете ме деп қорқады. Сондықтан Бас прокуратура қатаң бақылауға алғанын қалайды.

Еске салсақ, осыған дейін Шымкент коледждерінің бірінің жатқанасында 1 курс студенті қайтыс болғаны туралы хабарлаған болатынбыз.