Жамбылдық кәсіпкерлер түзеу мекемелерінде өз істерін ашуға ниетті

Жамбыл облысы прокуратурасының бастамасымен аумақтағы бизнес өкілдеріне түзеу мекемелерінде орналасқан өндірістік нысандар көрсетілді. Шара облыс әкімдігі және аймақтық кәсіпкерлер палатасының қолдауымен ұйымдастырылды.

Оның аясында 20-дан аса бизнесмен түзеу мекемелерінде жұмыс істеп жатқан өндірістермен танысты. Сондай-ақ, облыс прокуратурасының қызметкерлері бос тұрған нысандар бейнеролик арқылы көрсетіп, алу жолын түсіндірді.

Шараның басты мақсаты – сотталғандарға қосымша ақылы жұмыс орындарын ашу. Себебі, сотталғандардың түзу жолға түсіп, оңалуының негізгі тәсілі – еңбекпен тәрбиелеу.

Бүгінгі таңда, облыстағы түзеу мекемелерінде жазасын өтеп жатқан сотталғандардың 71 пайызы жұмыспен қамтылып, 30 өндірістік нысандарда еңбек етуде.

Мысалы, ҚАЖД ЖД – 158/7 түзеу мекемесінде ЖК «Шукуров» бөдене құсын өсіруді ұйымдастырып, етпен жұмыртқасын өткізумен айналысып, 12 сотталғанды жұмыспен қамтуда.

Осы түзеу мекемесінде ЖК «Ырысты» киіз үйді жасап, шығаруды ұйымдасытырып, 7 сотталғанға жұмыс беріп отыр.

Өткізілген іс-шараның қорытындысы бойынша 10 кәсіпкер түзеу мекемелерінде өздерінің өндірістерін ашуға қызығушылығын білдірді.