Жамбылда жаңа әлеуметтік жоба басталды
Жамбыл облысында Мемлекет басшысының «Заң мен тәртіп» тұжырымдамасы аясында, аймақтық Қазақстан халқы Ассамблеясы жанындағы Аналар кеңесінің бастамашы болуымен «Балам, заңнан аттама!» атты әлеуметтік жоба басталды. Осыған орай «Анаға тағзым» отбасын қолдау орталығында «дөңгелек үстел» отырысы өтті.
Жиынға Жамбыл облысы әкімінің кеңесшісі Хамит Есаман, ҚР Сыбайлас жемқорлыққа қарсы іс-қимыл агенттігі Жамбыл облыстық кеңесінің мүшесі Қасымхан Төлендиев, сот саласының ардагері Уәлиға Қайманова, прокуратура ардагері Күлзипа Әбдірахманова, Жамбыл облысы Полиция департаменті бастығының орынбасары Бауыржан Жанаев, облыс әкімдігі білім басқармасының бөлім басшысы Айжан Мейірханова және өзге де қоғам белсенділері, Аналар кеңесінің мүшелері, ардагерлер мен жастар қатысты.
Отырысты ашып, жүргізіп отырған облыстық «Анаға тағзым» отбасын қолдау орталығының директоры, аймақтық ҚХА Аналар кеңесінің төрайымы Эльмира Мырза-Ғали Мемлекет басшысының бастамасын қолдау мақсатында ұйымдастырылған жиынның маңызына тоқталды. Ол құқықтық тәрбие – ел болашағының берік іргетасы екенін атап өтіп, азаматтардың құқықтарын қорғау, әділдік пен заң үстемдігін қамтамасыз ету, қоғамда қауіпсіздік пен тәртіпті нығайту мақсатында қолға алынған жүйелі бастама екенін жеткізді.
Ал Жамбыл облысы әкімінің кеңесшісі Хамит Есаман заңға бағыну – азаматтық қоғамның ең маңызды тірегі екенін айтып, жастарға дұрыс құқықтық бағдар беру – мемлекеттік саясаттың басым бағыты және қазіргі қоғам үшін аса маңызды екенін жеткізді.
Еліміздің болашағы – адал ұрпақ тәрбиелеу тақырыбында аталмыш жиынға арқау болған мәселенің бірі еді. Бұл туралы ҚР Сыбайлас жемқорлыққа қарсы іс-қимыл агенттігінің Жамбыл облыстық кеңесі мүшесі Қасымхан Төлендиев «Әділ қоғам» тақырыбындағы баяндамасында қоғамдағы әділеттілік пен ашықтықтың орнауы – сыбайлас жемқорлықсыз болашаққа жол ашатынын айтып, бұл – «Заң және тәртіп» тұжырымдамасының басты мақсаты екенін жеткізді.
Сонымен қатар Уәлиға Қайманова мен Күлзипа Әбдірахманова «Құқықтық сауаттылық отбасынан басталады» және «Құқықтық мәдениет – қоғамдық сананың айнасы» атты тақырыпта баяндама жасап, бала тәрбиесінде құқықтық білімнің маңыздылығын арттырып, ата-ананың өмір салтында бала санасына заңға деген құрметтің қалыптасуында бұл тұжырымдама құқықтық бағыт беру үшін таптырмас құрал екенін айтты.
Жиында бұдан өзге құқықбұзушылықтың алдын алу шаралары таныстырылды. Аталмыш тақырыпта сөз қозғаған Полиция департаменті бастығының орынбасары Бауыржан Жанаев кәмелетке толмағандар арасындағы қылмыстың себеп-салдары мен мектеп колледждерде құқықтық түсіндіру жұмыстарын жиі өткізу қажет екенін айтты.
Жастардың құқықтық сауаттылығын арттыруды көздеген бұл жиында аймақтық ҚХА «Ассамблея жастары» қоғамдық бірлестігінің белсендісі, тіл жанашыры Эсмер Дурсунова мен «Жамбыл облысының жастар мәслихаты» жастар қоғамдық бірлестігінің төрағасы Азамат Нәмелбек те болды. Олар жастардың заңды білуі, өз құқықтары мен міндеттерін түсінуі – жауапты азаматтық ұстанымның көрінісі туралы пікірлерімен бөлісіп, замандастарын әділдікке және заңға құрметпен қарауға шақырды.
Жоба аясында өткен «дөңгелек үстел» отырысында жаңа 2025-2026 оқу жылында, яғни қыркүйек айынан бастап барлық аудандық, қалалық мектептерде, сондай-ақ жоғары оқу орындары мен колледждерде TedX форматында арнайы кездесулер өткізу жоспарланды. Бұл бастаманы жүзеге асыруға облыстық Ардагерлер, Ақсақалдар және Аналар кеңестерінің мүшелері, зиялы қауым және БАҚ өкілдері, құқық қорғау органдарының мамандары мен ардагерлері, білім басқармасы мен бөлімдері және жастар ұйымдары белсене жұмылдырылатын болды. Аталған кездесулер жүйелі түрде, арнайы бекітілген кесте бойынша өтетін болып келісілді. Шараға қатысқан сала мамандарына, мемлекеттік мекеме өкілдеріне және қоғам белсенділеріне осы бағыттағы жұмыстарды үйлестіру бойынша нақты тапсырмалар жүктелді. Жергілікті атқарушы органдар тарапынан кесте түзіліп, жоспарлы әрі нәтижелі жұмыс жүргізу көзделіп отыр.
Жиын соңы пікір алмасып, «Заң мен тәртіп» жобасына қатысты түрлі сұрақтарға жауап берумен түйінделді. «Балам, заңнан аттама!» тақырыбында өткен «дөңгелек үстел» отырысының қорытындысында айтылған ұсыныстар мен пікірлер негізінде Жамбыл облысы көлемінде кешенді құқықтық-ағартушылық жұмыс жүргізу туралы шешім қабылданды.