Жүрісіңнен жаңылма, «Тараз»!

Футболдан Қазақстан бірінші лигасындағы ойындар қыза түсті. Біріншіліктің кейінгі турларында ойындарына қарқын қосқан «Тараз» футболшылары сырт алаңда «Ақтөбе-Жас» командасымен кездесіп, кезекті үш ұпайды қоржынға салды.

Соңғы матчтарда ойыны жандана бастаған тараздықтар бұл кездесуде де жеңіске жету жолында аянып қалмады. Сондықтан, төрешінің ысқырығы шалына салысымен шабуылға иек артқан «Тараз» футбол клубының футболшылары ойын тізгінін өз қолдарына алуға тырысты. Допты бақылауда ұстай отырып, нәтиже шығаруды көздеген жерлестеріміздің ойлағандары кездесудің 28-минутында іске асты.
11 метрлік айыпдобын орындаған Әлішер Сүлей мүлт кеткен жоқ. Осылайша, ол командасын жеңіске жетеледі. Бұдан соң Әлішер бірінші кезең аяқталуға санаулы секундтар қалғанда мергендік танытып, нәтижені еселеді. Кездесудің екінші бөлігінде қос команда есеп аша алмады. Қорытынды есеп 0:2. Жеңісті жорығын жалғастырып келе жатқан жерлестеріміз мұнан соң 21-тур аясында «Мақтаарал» футбол клубын өз алаңдарында қабылдады. Бұл ойын да тартысқа толы өтті. Жергілікті жанкүйерлерді жерге қаратқысы келмеген «Тараз» футболшылары «ә» дегеннен допты өз бақылауларында ұстап, шабуылдаумен болды. Жерлестеріміз кездесудің 12-минутында гол соғып, алға шықты. Нәтижелі соққының авторы Берік Айтбаев. Бұл нәтижеге тоқмейілсімеген тараздықтарға ойынның 19-минутында есепті еселеуге керемет мүмкіндік туды. Бірақ, төреші белгілеп берген 11 метрлік айып соққысын Айдос Тәттібаев сәтсіз орындады. Ал, кездесудің екінші бөлігін ширақ бастаған «Тараз» футбол клубының жігіттері есепті еселеді. Ойынның 47-минутында гол соққан Абзал Таубай болатын. Тараздықтардың екі голына қонақ команда Роман Павиничтің салған жалғыз голымен ғана жауап қатты.
21-турдың қорытындысы бойынша «Тараз» футбол клубы 45 ұпаймен турнирлік кестенің 2-сатысында келе жатыр. Ал, бұл лигада бұған дейін топ тізгінін бермей келе жатқан шымкенттік «Қыран» футбол клубы үшінші сатыға бір-ақ сырғыды. Енді «Оқжетпес» көш бастап тұр.
Бүгінде футболдан аймақтың намысын қорғап жүрген команда Премьер-лигаға шығуды көздейтіні белгілі. Клуб басшылары да сол үдеден шығуға тырысып бағуда.
– Қазіргі таңда команданың ойыны бір жүйеге түсті. Жазғы трансфер барысында қатарымызға қорғаушылар Берік Айтбаев пен Мақсат Әмірханов, шабуылшылар Әлішер Сүлей мен Айдос Тәттібаевтарды қостық. Бұл футболшылар негізгі құрамның ойыншыларына серпін беріп, ойынды жандандыруда. Сондай-ақ, клубта Бразилияда оқып келген жас таланттарға да мүмкіндік берілуде. Атап айтқанда, 2000 жылы туылған Дінмұхаммед Қараман қосалқы құрамнан негізгі құрамға алынып, осы уақытқа дейін нәтижелі соққыларымен көзге түсіп үлгерді. Сырт мемлекеттен тәлім алған тағы екі футболшымыз футбол орталығында жаттығып жүр, – дейді «Тараз» футбол клубы басшысының орынбасары Ғабит Қазыбеков.
«Тараз» командасы осы сенбі күні екінші айналымның соңғы ойынын қызылордалық «Байқоңырмен» өткізеді. Естеріңізге сала кетейік, бірінші лигада топ жарған ұжым мен 2-орын иеленген команда Премьер-лигаға тікелей жолдама алады.
Тағы бір айта кететіні, жуық арада ғана клуб атрибутикасы сатылымға шыққан болатын. Бұл «Тараз» футбол клубының жанкүйерлерін қуантып тастаған еді. Бұған дейін еш жерде саудаланбаған клуб атрибутикасы саналатын «шарф», «кепка», жейделер бүгінде әр ойынның алдында сатылымға шығуда. Бұл мәселені футболсүйер қауымның көтеріп жүргеніне талай жылдың жүзі болған-ды. Мұнымен де тоқталып қалғысы келмейтін клуб басшылары «Тараз» командасының жеке дүкенін ашу үшін қала әкімдігінің рұқсатын алып қойыпты. Алдағы уақытта кірпіші қаланатын дүкенде клуб демеушілері «Тараз» командасының атрибутикаларын еркін саудаламақ.