Тұрғындарға берілетін әлеуметтік қолдау азаймайды
2022 жылы әлеуметтік көмек түрлеріне бюджеттен 552744,0 мың теңге қаралды. Оның ішінде: атаулы әлеуметтік көмекке 344 864,0 мың теңге, кепілдендірілген әлеуметтік топтамаға 107 459,0 мың тг, тұрғын үй көмегіне 30000,0 мың теңге, біржолғы әлеуметтік көмекке 70421,0 мың теңге бөлініп отыр.
Азаматтар тиісті құжаттарын ұсына отырып келесідей көмек түрлеріне, өтініш білдіре алады.
Мемлекеттік атаулы әлеуметтік көмек – жан басына шаққандағы орташа табысы белгіленген кедейлік шегінен аспайтын адамға немесе отбасыға және құжат тапсырған азаматтың өтініш берген кезеңнің алдыңғы тоқсанындағы табысын ескеріп тағайындалады. Өтініш білдіретін азаматтар Электронды үкімет порталы арқылы, Халықты жұмыспен қамту орталығы (ары қарай – Орталық) және ауылдық жерде ауылдық округ әкімі аппаратында орналасқан өзіне-өзі қызмет көрсету орталығы арқылы жүгіне алады.
Бұл ретте, өтініш берушіге сәйкестендіру үшін өзімен бірге жеке басын куәландыратын құжат болуы тиіс.
Өтініш қабылдау кезінде Орталық өтініш иесінің жазбаша келісімі негізінде «электрондық үкімет» шлюзі арқылы тиісті мемлекеттік органдардың және ұйымдардың ақпараттық жүйелеріне (бұдан әрі – ақпараттық жүйе) сұрау салу арқылы мәліметтері жинақталатынын еске саламыз.
Кепілдендірілген әлеуметтік топтама – мемлекеттік атаулы әлеуметтік көмек алушы азаматтар Әлеуметтік қызмет көрсету порталында (электронды цифрлы қолтаңбамен қол қоя отырып) өтініш беру арқылы, 1 — 6 жас аралығындағы балаларына азық-түлік түрінде тапсырыс бере алады.
Тұрғын үй көмегі –Талас ауданы әкімдігінің жұмыспен қамту және әлеуметтік бағдарламалар бөлімімен берілетінін білесіздер.
Өтініштерді қабылдау және мемлекеттік қызмет көрсету нәтижелерін беру «Азаматтарға арналған үкімет» мемлекеттік корпорациясының» Талас аудандық бөлімі (бұдан әрі – Мемлекеттік корпорациясы) немесе www.egov.kz Электронды үкімет порталы арқылы жүзеге асырылады.
Тұрғын үй көмегін тағайындау төмендегі пайдалану нормасына сәйкес жүргізіледі:
1) өтемақы шараларымен қамтамасыз етілетін тұрғын үй алаңының нормалары:
- жеке басты азаматтар үшін — 30 шаршы метр, бірақ бір бөлмелі пәтердің мөлшерінен аз емес және нақты алып жатқан алаңынан артық емес;
- екі және одан да көп адамнан тұратын – отбасының әр мүшесіне 18 шаршы метрден 72 шаршы метрге дейін, бірақ нақты алып жатқан алаңынан артық емес.
2) электр қуатын тұтыну нормалары (бір айда): - бірден бес адамға дейінгі отбасына — отбасының әрбір мүшесіне 80 киловатт;
- бес және одан да көпмүшелі отбасына — 400 киловатт.
Тұрғын үйді қамтамасыз етуге қажетті сумен жабдықтау, жылумен жабдықтау, қоқыс шығару шығыстарын пайдалану нормалары мен тарифтерін қызмет көрсететіндер ұсынады (түбіртек негізінде).
Тұрғын үй көмегін алуға үміткердің жеке меншікте екі және одан көп тұрғын үйі болған жағдайда тұрғын үй көмегі тағайындалмайды.
Біржолғы әлеуметтік көмек –өмірлік қиын жағдай туындаған кезде әлеуметтік көмек алу үшін өтініш беруші өзінің немесе отбасының атынан уәкілетті органға немесе кент, ауыл, ауылдық округ әкіміне өтінішке қоса мынадай құжаттарды:
1) жеке басын куәландыратын құжатты;
2) адамның (отбасы мүшелерінің) табыстары туралы мәліметтерді;
3) өмірлік қиын жағдайдың туындағанын растайтын актіні және/немесе құжатты ұсынады.
4) Адамның (отбасы мүшелерінің) табысына қарамастан тағайындалатын әлеуметтік көмекті алу үшін адамның (отбасы мүшелерінің) табыстары туралы мәліметтер ұсынылмайды.
Қосымша сұрақтар бойынша, Талас ауданы әкімдігінің жұмыспен қамту және әлеуметтік бағдарламалар бөліміне 8 (726 44) 6-06-11 телефоны арқылы хабарласуға болады.