САРЫСУ ЖЫРЛАЙДЫ АТТЫ АУДАНДЫҚ БАЙҚАУ ӨТТІ
Поэзия әлеміне көз салсақ қазақ халқының арман — мұраты, шаттығы мен қайғысы ең алдымен ақын жүрегінде буырқанып, сыршыл өлеңдеріне арқау болған. Әдемі өлең, сұлу жыр өмірге құштар ақыннан ғана тумақ. Ақындар ішінде туған ел, ата-мекен, туған халқына деген шексіз сүйіспеншілігін, шалқар махаббатын шабыттана жырламағаны кемде-кем болар. Сарысу өлкесі – жырға бай. Қазақ өлеңіне үлкен үлес қосқан талай тарлан таланттар шыққан.![]()
Бүгін Саудакент ауылдық мәдениет үйінде аудан әкімінің қолдауымен «Әулиеата-кітап оқитын өңір» жобасы аясында жергілікті ақын — жазушылардың өлеңдерінен аудандық«Сарысу жырлайды!» атты байқауы өтті.
Шараға аудан әкімі Сәкен Мамытов құттықтау қатысып, құттықтау сөз сөйледі. Ауданымыздан шыққан ақын — жазушыларды насихаттау мақсатында ұйымдастырылып отырған шараның маңыздылығына тоқталып, қатысушыларға сәттілік тіледі.
Жыр додасына қатысушылар жергілікті ақындар Дулат Шалқарбаев, Тынышбай Рақым, Асылбек Саттаров, Әлсейіт Әлмен, Ескермес Ескендіров, Маралтай Райымбекұлы, Асхат Абзалбеков, Тұрсынбек Сұлтанбековтердің шығармаларынан мәнерлеп жатқа оқып, жүрекжарды өлеңдерін арнады.Екі номинациядан құралған сайысқа аудандық ардагерлер кеңесі төрағасының орынбасары Ақділда Диханбай , айтыскер ақын, айтыс ақындары мен жыршы — термешілердің Халықаралық Одағының мүшесі Талғат Хусайынов, ақын, еңбек ардагері Советкүл Жарылқасынова, аудан әкімдігінің ішкі саясат бөлімінің «Жастар ресурстық орталығы » КММ-нің директоры Мадина Пірімбек және ақын, «Аманат» партиясы аудандық филиалының консультанты Самат Тоқбанов әділқазылық етті. Байқауға 20 — дан аса қатысушылар бақ сынасты.
Жыр төгілген сайыстың қорытындысы бойынша бас жүлдені Әбілдә ауылынан келген Әли Мамырбек жеңіп алса, жүлделі 1 — орынмен Игілік ауылының жас ақыны Ақбілек Бейсенқызы марапатталды. Екінші орынға саудакенттік Жәния Қошан лайық деп танылса, үшінші орынды Ақтоғай ауылынан келген Нұрай Ермекбай місе тұтты. Барлық қатысушыларға алғыс хаттар мен кітаптар сыйға тарту етілсе, жеңімпаздар мен жүлдегерлерге диплом және бағалы сыйлықтар тапсырылды.