Құрметті бұқаралық ақпарат құралдарының қызметкерлерімен сала ардагерлері!

Сіздерді кәсіби мерекелеріңіз — Бұқаралық ақпарат құралдары қызметкерлері күнімен шын жүректен құттықтаймын!

Ақпарат саласы – қоғамдық сана мен пікір қалыптастыратын маңызды сала.

«Төртінші билік» деп аталатын баспасөз өкілдерінің қоғамдағы әсері орасан зор. Газет белгілі бір мәселеге бұқараның назарын аударып, сол мәселе төңірегінде пікір туғызады, ұсыныс айтылады.

Журналист болу — халыққа қызмет ету. Елге адал қызмет ету — әр журналистің абыройлы міндеті. Мемлекет басшысы Қасым-Жомарт Тоқаев «Масс-медиа туралы» Қазақстан Республикасының Заңына қол қойды. «Журналистің ерекше мәртебесі» деген ұғым енгізіліп, журналистерге қосымша құқықтық кепілдіктер белгіленді. Баспасөз өкілдеріне деген қолдаудың арқасында журналистердің қоғамдағы орны мен ерекше мәртебесі айқындалды.

Елімізде баспасөз бен тележурналистика, ақпараттық сайттар заман талабына сай түрленіп, қоғамға қажетті маңызды ақпараттарды уақтылы таратып келеді. Ақпарат айдынында еңбек етіп жүрген тілшілер қауымы заман көшінен қалмай, жаңа медианы меңгеріп абыройлы қызмет атқарып жүр.

Біздің аудан өмірінің айнасына, тұтастай тарихы мен шежіресіне айналған аудандық «Сарысу» газеті бүгінде көпшіліктің сүйіп оқитын басылымына айналған. Қоғамдық-саяси басылым әр кезеңнің талабына сай шығармашылықпен еңбек етіп, аудан тұрғындарының қалтқысыз құрметіне бөленіп келеді.

Аудан газетінде әр жылдары еңбек етіп, өзіндік қолтаңбасын қалдырған Пернебай Дүйсенбин, Бергентай Нұрмаханұлы, Жаңабай Миллионов, Диханбай Ақділда, Темірлан Әбілдаев, Болатбек Төлепберген, Амангелді Әбіл, Тұрсынбек Сұлтанбек, Асхат Райқұл сияқты қаламгерлеріміздің еңбегі көпке үлгі.

Алдағы уақытта да аудандық газет ұжымы мен баспасөз қызметі аудандағы жаңалықтарды салмақты сөз, салиқалы пікірлерімен жеткізіп, ел игілігіне еңбек ете береді деп сенеміз.

Құрметті баспасөз саласының қызметкерлері!

Алаштың ардақтысы Міржақып Дулатұлының «Қай жұрттың баспасөзі мықты болса, сол елдің өзі де күшті» деген тұжырымы бүгін де барынша өзекті.

Сіздерге еселі еңбектеріңіз үшін алғысымды білдіре отырып, мықты денсаулық, отбасыларыңызға амандық, шығармашылық табыс пен шалқар шабыт тілеймін.

Қасиетті қаламның құдіреті шығармашылықтың шыңына көтеріп, абырой-беделдің биігіне асқақтатсын!

Журналистеріміз жағымды жаңалығымен жұртшылықты қуанта берсін!

Мереке құтты болсын!