Қой төлімен көбейеді

С.Шәкіров ауылы – егін және мал шаруашылығынмен танылған елді мекен. Іргесінен Талас өзені ағып жатқан аймақтың жері де шұрайлы. Кезінде мұнда дәнді дақыл — жүгерінің де бітік шыққанын көз көргендер әлі күнге айтып отырады.
Округтегі тірлікке білек түргендер қазір мал шаруа­шылығымен айналысуды жөн көреді. Ауылдық округке тиесілі 55 шаруа қожалығы болса, оның 50-ге жуығы атакәсіпті игерген. Төрт түліктен нәсібін айырған шаруалардың қатары артқан сайын мал басы да көбейеді. Мұны ауылдық округ әкімі Ринат Бекбосын да растап отып. –Бейнетіне бейімделе білсең, төрт түлік табыс көзі,-дейді Ринат Ертайұлы. Ия, «қой төлімен көбейеді»,-деген.
«Саян» шаруа қожалығы да машақатына қарастан мал басын артыруды мұрат тұтып келеді. Құрылғанына он жылға жуық уақыт өтпесе де, қазір тірлігі тік. Жұмыстың жүруі, істің нәтиже­сі басшыға байланысты десек, бұл орайда шаруа қожалық төра­ғасы Ермахан Омарбековтың саладағы тәжірибесі аз емес.
О, баста тері қабылдаумен тірлігін бастаған Ермахан көп қиындықтан өтті, тәжірибе жинады, болашаққа жоспар құрды. Олжа оңай келмейді. Оны шаруаның өзі жақсы біледі. «Агрокорпорация» АҚ-ы арқылы 11 млн. теңгеге несие рәсімдеп,асыл тұқымды «Әулиекөл» сиырын және уақ мал басын сатып алып, түліктің басын құрады, тірлігіне жан бітірді.
-Малдың көбеюі, түліктің қыстан аман шығуына байланысты ғой. Ауылда өскен соң мал тірлігі таңсық емес. Шөп қорын жеткілікті етіп алдық. Дегенмен, биылғы қыс жайлы болды. Пайдаланып отырған құдығымыз ертеден бар. Мемлекет тарапынан күннен қуат алатын панель орнатып, нәтижесінде электр қуатын пайдаланып отырмыз. Қазір шаруа қожалығында 1 отар қой және асыл тұқымды ірі қара басы бар,-дейді шаруаның өзі.
Жоқтан барды құраған, барды табысқа айналдыра білген Ермахан биыл 100 саулықтан 100 төл алып отыр. Өзінің сөзінше, өткен көктемде де осылай болған. Бұған енді табанды еңбектің жемісі демеске лажың жоқ. Өйткені, осынша жұмысты тек малшысы Самат Жекебаев екеуі ғана атқарған. Себеп, малшы тапшы.
-Жеке немесе отбасымен келісіп жатса, еңбекақысы мен азық-түлігін беруге әзірмін. Мал бағу қиын. Оны қолға таяқ ұстап мал соңында жүру оңай шаруа емес. Бірақ малшы табу қиын. Қыстауға «Қойшыбай» құмына алып барамыз. Біз мұнда наурыз айының басында келдік,-дейді Е.Омарбеков.
Шаруа малды құмда қыс­татады. Келген беттен мал төлдету-сақпанға кірісіп кетті. Байқағанымыздай шаруаның еңбегі шаш-етек. Кезегін күткен жұмыс көп. Бәріне шыдамдылық танытып, уақыт табу керек.
Жалпы, С.Шәкіров — шалғай ауылдардың қатарына жатады. Десе де, мұнда көгілдір отын мен ауыз су тартылған, әлеуметтік нысандар қызмет жасап тұр, көшеге жол төселген. Қоныс аударып жатқандарды көрмейсіз. Алайда, іске ниет танытып, нәсібін кәсібінен айырып жатқандар кем. Ермахан сынды тәуекелге барып, тірлік білдіргердерің ісі өзгеге үлгі болса игі. Біздің айтпағымыз да-осы.