«Көктемнің бір күні жылға азық»

On Апр 16, 2023

Несібесін қара жерден іздеген шаруаның Арқаның алты ай қысынан ұзақ мерзімді демалыстан кейін көктемгі дала жұмысына дайындалатын уақыты келді. «Көктемнің әр күні жылға азық» деп, диқандар дәнін дайындап, жерін жыртып, дала дүбірін қыздыра түседі. Жауапты науқанның алдында облыс диқаншыларының жайы қалай?

Қаһарлы қыс қыр асып, қарбаласқа толы көктемнің бел ортасына келдік. Қым-қуыт күйбең тірлікке толы мезгілде дала төсі де еңбек дүбіріне айналады. Бұл диқандар үшін қайнаған еңбектің қызатын шағы. Бүгінде аймақтағы агроқұрылымдар көктемгі дала жұмыстарына белсене кірісіп кеткен. Бұл қатарда Сарысу ауданының диқандары да бар.

Жуырда аудан шаруаларының жағдайын білмек мақсатта аудан әкімінің міндетін атқарушы Сәкен Мамытов және аудан әкімінің орынбасары Қайрат Аманов шаруашылықтарда болып, көктемгі дала жұмыстарының барысын бақылап шықты. Шаруашылық иелерімен кездесті. Егін егумен айналысып жатқан шаруа қожалық мүшелерімен сөйлесіп, қандай қажеттіліктер, нендей қиыншылықтар бар екенін, жанар-жағар маймен қамтамасыз етілу барысын сұрады. Техникалардың жағдайын көріп, дайындық барысына қанықты.

Биыл ауданда 24 500 гектар алқапта жаздық ауылшаруашылығы дақылдары орналастыру жоспарланған. Бұл өткен жылғы егістік алқабынан 271,5 гектарға артық.

Көктемгі дала жұмыстарына ауылшаруашылық техникаларының 510 данасы қатысуда. Оның ішінде 342 трактор, 45 дана соқа, 28 дана қопсытқыш, 85 дана дән сепкіш бар.

Жанар-жағар май шаруашылықтарға таратылып берілуде. Көктемгі дала жұмыстарын жүргізу үшін 780 тонна жеңілдетілген дизель отыны бөлінген болатын. Тарату бағасы 1 литріне 212 теңгеден.

Аудан әкімінің міндетін атқарушы Сәкен Үмбетұлы бар мүмкіндіктерді қарастыра отырып, көктемгі дала жұмыстарын ойдағыдай аяқтау керектігін айтып, сала басшыларына жұмысты әрі қарай жандандыру мақсатында тапсырмалар берді.