Жайық-Каспий өңіраралық бассейндік балық шаруашылығы инспекциясының маманы Андрей Руцкийдің сөзінше, 23 қарашада итбалықтың өлексесі табылмаған. Сондықтан оң болжамға үміт бар дейді. Оның үстіне өңірде желдің бағыты өзгерген.

• Каспий теңізіндегі итбалықтардың қырылуына жер сілкінісі себеп болуы мүмкін

• Маңғыстауда итбалықтардың жаппай қырылуы: Ұрғашылардың жартысынан көбі буаз болған

Экология және табиғи ресурстар министрлігі Қоғамдық кеңесінің мүшесі Әділбек Қозыбақовтың айтуынша, теңіз жануарларының қырылуынан келген шығын 1,5 миллиард теңгеге бағалануы мүмкін.

«Қазақстан Ауыл шаруашылығы министрлігінің 2017 жылғы бұйрығына сәйкес бір итбалықтың құны 193 АЕК (712 мың 556 теңге). Бұл соманы 2 000 итбалыққа көбейткенде 1 миллиард 425 миллион 112 мың теңге болады”, – деді ол.

Қазіргі уақытта итбалықтардың жаппай қырылуының себептері анықталып жатыр.

Қозыбақовтың сөзінше, кінәлілерді заң аясында жазалап, келтірілген шығынды өтеуді талап ету керек.

Айта кетейік, бұған дейін Маңғыстаулық фотограф Азамат Сәрсенбаев желідегі парақшасында Түпқараған ауданына қарасты Баутин ауылында дауылдан кейін 150-ден аса итбалықтың өлекселері шығарылғанын жазған еді. Кейіннен 2 мыңға жуық итбалықтың өлексесі табылған.

Фото: Гидробиология және экология институты

https://stan.kz/kaspiy-tenizinde-itbaliktardin-zhappay-kiriluinan-kelge-410086/