Қаскелеңде бір үйір жылқы айдап өткендердің кім екені белгілі болды (ВИДЕО)
Алматы облысы Қаскелең қаласында көше бойымен жылқы айдап өткендердің кім екені анықталып, жауапкершілікке тартылды деп хабарлады turkystan.kz.
Әлеуметтік желіде Қаскелең қаласында көше бойымен шауып бара жатқан үйір-үйір жылқының видеосы тараған болатын.
Алматы облысы Полиция департаментінің баспасөз қызметі осы жайтқа қатысты пікір білдіріп, 30 мамырда әлеуметтік желіге мониторинг жүргізу барысында Қаскелең қаласы көшелерінің бірінде 200-ге жуық жылқы жүріп өткені туралы видео анықталғанын атап өтті.
«Қарасай ауданы аумағында Жамбыл ауылы жағынан Алматы-Екатеринбург бағытындағы автокөлік жолымен оңтүстікке қарай 200-ге жуық жылқы айдалған. Жылқылар Қаскелең қаласындағы Асқаров көшесінен оңтүстік бағытқа мал жайылатын жерге бара жатқан», – дейді облыстық Полиция департаменті өкілдері.
Аталған дерек бойынша үш азамат анықталып, әкімшілік жауапкершілікке тартылды.
«Іздестіру жұмыстары барысында Қарасай ауданы полиция басқармасы ЖПҚБ қызметкерлері Әкімшілік құқықбұзушылық туралы кодекстің 408-бабы 1-бөлігі (ауыл шаруашылығы жануарларын жаю қағидаларын бұзу), сондай-ақ Әкімшілік құқықбұзушылық туралы кодекстің 505-бабы 1-бөлігі (аумақтарды абаттандыру қағидаларын бұзу) бойынша үш азаматты анықтап, әкімшілік жауапкершілікке тартты», – дейді полициядан.