«Ерекше» балаларға – айрықша қамқорлық

Даму мүмкіндігі шектеулі балаларға қоғамымыздың көзқарасы өзгерген сайын, оларды оңалту жолдарына, мүмкіндіктеріне жол ашылуда.
Осы орайда мұндай балаларға білім беріп, психологиялық — педа­гогикалық қолдау үшін ата-ана, құрдастары, ұстаздар тарапынан көп еңбек, кішіпейілділік керек. Оларға қарапайым ұғымдарды түсіндіру, жеткізу оңай емес және әсер ету жолдары да әртүрлі болып келеді.
Мүмкіндігі шектеулі балаларды психологиялық — педагогикалық қол­даудың маңызды міндеті педагог-психологтың ата- аналармен жұмы­сы болып табылады. Отбасында тәр­биеге қолайлы жағдай жасау үшін ба­ланың даму ерекшеліктерін, оның мүмкіндіктері мен даму болашағын білу, мақсатты түзету сабақтарын ұйымдастыру, өмірге бейімдейтін ерікті қасиеттерді дамыту ата- ана тарапынан жүргізілуі тиіс. Сондықтан баламен қатар ата –аналармен де ынтымақтастықты нығайтып, жұмыс жүргізіп отыру керек. Қаратау қаласындағы «Мүгедек балаларды оңалту және бейімдеу орталығында» педагог – психолог Нұржамал Қонарбекова ұйымдастыруымен «Бір біргеміз» атты шара өтті. Ата- аналар арасында ойын — тренинг түрінде өткен шарада «Мен сен сияқтымын», «Жақсы тілек», «Менің жақсы қасиеттерім» деген сияқты баланың жанына үңілу, оны эмоцияналды қолдау, мүмкіндігіне қарай ортаға бейімдеу, психолгиялық қолдауға бағытталған ойындар ойнатылды.
Шараны ұйымдастырудағы мақсат — осындай тренингтер арқылы ата- аналарға балаларды бейімдеуде көмек беру. Орталықта инклюзивті білім алатын мұндай балалар ата-аналар тарапынан да жан-жақты қолдау табуы керек, ал мұндай педагогикалық — психологиялық шаралар сол балалардың ата-анасына көрсетілген әдістемелік құрал іспетті.
«Балалар жылы» аясында балаларды қорғауға, оларды сапалы біліммен қамтуға, мүмкіндігі шектеулі балалардың денсаулығын нығайтуға бағытталған нақты шаралар жүзеге асуы тиіс. Осы мақсатта «Дені сау бала» жобасы аясында мүмкіндігі шектеулі балаларды медициналық оңалтумен қамтуды ұлғайту іске асады. Қазіргі таңда бұл бағыттағы шаралар жергілікті жерлерде кезең-кезімен іске асуда.