ДІНИ САУАТ АШУ КУРСЫН ОҚЫТУ ОРТАЛЫҒЫ АШЫЛДЫ
Діни сауат ашу курсын оқыту орталықтары – тек қана халықтың діни сауатын ашып қана қоймай, қоғамды ізгілікке үйрететін, елдің руханиятын ұстап тұратын рухани білім ордасы.![]()
Бүгін аудан орталығы Жаңатас қаласындағы орталық мешіттің жанынан «Казфосфат» жауапкершілігі шектеулі серіктестігінің демеушілігімен жаңа діни сауат ашу курсын оқытуға арналған орталық ашылды.![]()
Игілікті шараға құрметті қонақтар, ауданның құрметті қариялары мен зиялы қауым өкілдері, ел ағалары, мешіт имамдары мен аудан тұрғындары көптеп жиналды.
Алдымен Қазақстан Мұсылмандары Діни Басқармасының Жамбыл облысы бойынша өкіл имамы, Жамбыл облысының бас имамы Бейбіт Мырзагелдиев арнайы Құран бағыштады. Исламды тануда, жастарды имандылық пен адамгершілікке тәрбиелеп, діни сауат ашуда, арнайы діни сауат ашу курсын оқытуға арналған орталықтың маңыздылығына тоқталды.![]()
Бұдан кейін сөз сөйлеген Сарысу аудандық ардагерлер кеңесінің төрағасы Жанат Жұмаділдаев, Жамбыл облысының Құрметті азаматы Батырбек Құлекеев, Сарысу ауданының Құрметті азаматы Тыныштық Бектөреева, «Казфосфат» ЖШС-нің бас директорының орынбасары Ерсін Сариев жиналғандарды жаңа діни сауат ашу орталығының ашылуымен құттықтап, жаңадан ашылған бұл орталық үлкен имандылық ордасына айналып, елдің игілігі үшін жұмыс жасай беруіне тілектестігін білдірді.
Арнайы берілген асқа жайылған дастархан басында сөз алған аудан әкімінің орынбасары Ерлан Ермағамбетов биылғы Жамбыл облысының 85 жылдығы және Жаңатас қаласының 55 жылдығы аясында пайдалануға беріліп жатқан жаңа діни сауат ашу орталығының бой көтеруіне демеушілік жасаған, басы-қасынан табылған «Казфосфат» ЖШС-нің басшыларына, елге, тілге, дінге жанашыр азаматтарға ризашылығын білдірсе, Сарысу ауданының Құрметті азаматы Ермекбай Ақылбеков, жазушы Пернебай Дүйсенбин, еңбек ардагері Диханбай Ақділда сөз сөйлеп, жамағатты игілікті шарамен құттықтап, елдің амандығын, жұрттың тыныштығын тіледі.![]()
Шараға арнайы қонақ болып қатысқан, Сарысу ауданының бұрынғы бас имамы Ғалымжан Қонақбаев осы игілікті істің бастауында болған кездегі естеліктерімен бөлісіп, адам баласын тәрбиелеуге бағытталған Мәшһүр Жүсіп Көпейұлының айтқандарынан үзінділер келтірді.
Дастархан басында ауданның ақсақалы Басие Абдрахманов бата беріп, арнайы Құран бағышталды.
Осы күні орталық мешіттің жанынан діни кітаптар және өзге де ислами заттар сататын «Фирдаус» ислами заттар дүкені ашылды.
Жиналған жамағат діни сауат ашу орталығы мен ислами заттар дүкенін аралап көріп, ел игілігі жолында жасалып жатқан сауабы мол істерге ризашылықтарын білдіріп жатты.