Бүгін Рахымжан Отарбаевтың туған күні
Еліміздің көрнекті қоғам қайраткері, жазушы-драматург, Қазақстан Республикасының Еңбек сіңірген қайраткері Рахымжан Қасымғалиұлы Отарбаев 1956 жылы 19 қазанда Атырау облысы, Құрманғазы ауданында дүниеге келген.
1977 жылы Орал педагогика институтын бітірген талантты жазушы әр жылдарда «Орал өңірі» газетінде тілші, «Ленин жолы» газетінде радиотілші еңбек етіп, шығармашылық жолын бастады. Қазақ телерадио комитетінде редактор, «Қазақ әдебиеті» газетінде, «Жалын» альманағында бөлім меңгерушісі болды. Маңғыстау облыстық радиотелевидение компаниясының төрағасы, Атырау облыстық драма театрының директоры, ҚР Президенті Әкімшілігінде сектор меңгерушісі қызметтерін атқарды.
«Түнгі от», «Шер», «Жұлдыздар құлаған жер», «Жайық жыры», «Қараша қаздар қайтқанда», «Дауысыңды естідім», «Шыңғысханның көз жасы», «Біздің ауылдың амазонкалары», «Отверженный мир» атты прозалық жинақтары және таңдамалы шығармаларының 2 томдығы жарық көрді.
«Бейбарыс сұлтан», «Бас», «Нашақор жайлы новелла», «Нұржауған-ғұмыр», «Сырым батыр», «Мұстафа Шоқай» сынды пьесалары республикалық және шетел театрларында сахналанды. Өмірінің соңғы жылдарында «Ақ Жайық kz» әдеби, қоғамдық-саяси журналын ашып, редакторлық жасады.
Қазақстанның Еңбек сіңірген қайраткері, «Құрмет» және «Парасат» орденімен марапатталған.
Қазақ әдебиетінен өзіндік орнын алған Рахымжан Отарбаев 2017 жылы 17 ақпанда өмірден озды.
https://turkystan.kz/article/200810-bugin-rahymzhan-otarbaevtyn-tugan-kuni/