Көкпекті ауданындағы орталық аурухана күрделі жөндеуден өтіп жатыр

Аурухана ғимараты 2010 жылы салынған. Қазіргі таңда медициналық мекемеде 243 адам еңбек етеді. Аурухананың стационары хирургия, инфекциялық, перзентхана және терапия сияқты төрт бөлімшеден тұрады. Тәулік бойғы стационарда 40 төсек, ал стационар жанындағы күндізгі бөлімде 10 төсек бар.

Қазіргі уақытта ғимаратта ішкі әрлеу жұмыстары жүргізіліп, едендер, терезелер мен есік блоктары күрделі жөндеуден өтуде. Сонымен қатар ас блогы, кір жуатын орын, дезинфекциялау бөлімшесі, галерея және балалар бөлмесінде ішкі әрлеу жұмыстары жүргізіледі. Жөндеу жұмыстарын 2027 жылдың желтоқсан айында аяқтау жоспарланған.

Бір жыл бұрын ауруханада күрделі жөндеу жүргізіліп, жедел жәрдем блогының кіреберісі қайта жаңғыртылды. Сонымен қатар, аурухана ғимаратының қасбеті жаңартылды. Алайда кіре берістегі кафельдер түсе бастаған.

Аймақ басшысы аурухананың бас дәрігеріне ескерту жасап, орын алған олқылықтарды қысқа мерзімде жоюды, мердігерлерге ауруханада жүргізіліп жатқан жұмыстарды сапалы әрі белгіленген мерзімде аяқтауды тапсырды.

«Аурухана – тазалық пен тәртіптің айнасы. Мұнда тазалыққа қойылатын талап та жоғары болуы тиіс. Бас дәрігер тапсырыс беруші болған соң қадағалап, мердігерден талап етуі керек қой. Бюджет қаражатын тиімді игеруіміз қажет. Бұл нысанға осымен үшінші рет келіп тұрмын. Келген сайын алдымнан кемшіліктер шығады. Денсаулық сақтау басқармасына бас дәрігердің жауапкершілігін қарап, ұсыныс беруді тапсырамын. Кепілдік негізінде олқылықтардың бәрін қалпына келтіріп, құрылыс жұмыстарын қатаң бақылауда ұстау керек», – деді Берік Уәли.

«Ауылдық денсаулық сақтауды жаңғырту» ұлттық жобасы аясында ауданның Биғаш, Шәріптоғай, Мамай, Үлгілімалшы, Үшкөмей және Қарамойыл ауылдарында медициналық нысан салынды. Нәтижесінде 1550 ауыл тұрғыны медициналық көмекпен қамтылды.