АЛТЫН ҚҰРСАҚТЫ РЫСЖАН АПА
8 наурыз — Халықаралық әйелдер күні мерекесіне орай, аудан басшылығының құттықтаулары жалғасып жатыр. Бүгін аудан әкімінің орынбасары Жанғозы Жаркенов пен Жаңаталап ауылдық округінің әкімі Нұрхан Ақмағанбетов Жаңаталап ауылының тұрғыны, Тыл ардагері, алтын құрсақты ана Рысжан Сағындықованың үйінде болып, мерекемен құттықтады.
Жастайынан еңбекке ерте араласқан Рысжан әже 1938 жылдың 27 тамызында Жаңаталап ауылында дүниеге келген. 1956 жылы тұрмыс құрып, жолдасы Қыдырәлі Сағындықов екеуі 10 ұл — қыз тәрбиелеп өсіреді. Жолдасы Қыдырәлі атамыз Ұлы Отан соғысының ардагері болған. Соғыстан кейін еңбекке араласып, Тыл ардагері атанады.Бүгінде үлкен әулетке айналған алтын құрсақты ана арнайы атбасын бұрып, мерекемен құттықтап келген аудан әкімінің орынбасары Жанғозы Өмірғалиұлына ризашылығын білдірді.Жанғозы Жаркенов Рысжан әжейді мерекемен құттықтап, гүл шоқтарын беріп, сый — сыяпат көрсетті. Ауданға еңбегі сіңген, дуалы ауыздан дұғасы үзілмеген әженің бар тілегі ұлтымыздың тұтастығы мен бірліктің бекемдігі.