Желіде тараған видеодан қонақүйдің алдында тұрған көліктің бірден жарылып кеткенін көруге болады. Жергілікті билік көлік жарылысынан бір адам қаза тауып, бірнеше адам жараланғанын хабарлады.

Құқық қорғау органдары Tesla көлігіндегі жарылысты теракт деп санайды.

Трамптың жақын одақтасы және Tesla компаниясының иесі Илон Маск жарылысқа қатысты өз тергеуін бастағанын мәлімдеді.

«Біз жарылыстың жалға алынған Cybertruck көлігіндегі өте күшті отшашу немесе бомбаның әсерінен болғанына және көліктің өзіне қатысы жоқ екеніне сенімдіміз. Жарылыс кезінде көліктің барлық телеметриялық деректері дұрыс жұмыс істеп тұрған», – делінген Масктің желідегі жазбасында.

Лас-Вегас полиция департаменті жүргізуші қонақүй тұрағына кірген кезде, көлік жарылғанын мәлімдеді. Құзырлы органдардың хабарлауынша, көлік жүргізушісі оқиға орнында қаза тауып, жеті адам жеңіл жарақат алған.

Құқық қорғау органдары Жаңа Орлеандағы теракт пен Лас-Вегастағы жарылыс арасында байланыс болуы мүмкін екенін алға тартты. Екі жағдайда да көліктен «Ислам мемлекеті” лаңкестік ұйымының қара туы табылған, сондай-ақ екі көлікте бір қосымша арқылы жалға алынған.

Еске салсақ, бұған дейін АҚШ-тың Жаңа Орлеан қаласында белгісіз қылмыскер теракт жасап, көпшілікті жүк көлігімен басып, содан кейін оқ жаудырғаны туралы жазған едік. Теракт салдарынан 15 адам көз жұмды.

Фото: reuters.com

https://stan.kz/aksh-tagi-tramp-konakuyinin-aldinda-tesla-koligi-zharil-411982/