ЗАҢ МЕН ТӘРТІП – ҚАУІПСІЗ БАЛАЛЫҚ ШАҚ КЕПІЛІ

Қазақстанда әділетті қоғам қалыптастыру – басты басымдықтардың бірі. Осы бағытта Мемлекет басшысы Қасым-Жомарт Тоқаев адал әрі жауапты азамат тәрбиелеу мәселесіне ерекше мән беріп келеді. Қоғамда «Заң мен тәртіп» қағидатын нығайту ісі білім беру ұйымдарынан бастау алуда.

Бүгін аудандық мәдениет үйінде «Заң мен тәртіп – қауіпсіз балалық шақ кепілі» тақырыбында аудандық ата-аналар форумы өтті. Форумға қатысқан аудан әкімі Сәкен Мамытов құттықтау сөз сөйлеп, баланың қауіпсіз әрі бақытты өсуі – тек мектептің ғана емес, ең алдымен отбасының, қоғамның жауапкершілігі екенін айтты. Сонымен қатар, «Жас StarGov» клубының мүшелеріне арнайы куәлік тапсырды. Мұнан соң аудан прокуроры Елдос Әмірхан «Жас прокурор», аудандық полиция бөлімінің бастығы Ринат Оразбайұлы «Жас сарбаз», ауданы төтенге жағдайлар бөлімі бастығының міндетін уақытша атқарушы Қуаныш Тастыбаев «Жас құтқарушы» куәліктерін табыстады. Тәрбие алаңына айналған форумда облыстық ата-аналар комитетінің төрайымы Нәзима Жұбандықова мен аудандық білім бөлімінің басшысы Жуаныш Жарықбасов та сөз сөйлеп, шараның маңыздылығына тоқталды.

Шара соңы концерттік бағдарламаға ұласып, ауданның өнерпаздары өнерлерін көрсетіп, көпшіліктің ықыласына бөленді. Отбасының қоғамдағы мәртебесін айқындайтын маңызды алаң осылайша өз мәресіне жетті.