Таңдауымыз – адал қоғам

Қоғамның дамуы мен мемлекеттің өркендеуі ең алдымен ондағы азаматтардың ұстанымы мен әрекетіне байланысты. Әділдікке негізделген, ашық әрі жауапкершілігі жоғары орта қалыптастыру – бүгінгі күннің өзекті талабы. Осы орайда «адал қоғам» құру – тек мемлекеттік органдардың міндеті емес, баршамыздың ортақ таңдауымыз әрі борышымыз.

Адалдық – жеке тұлғаның ең биік қасиеттерінің бірі. Ол адам мінезінің айнасы, қоғамның рухани тірегі. Әрбір азамат өз ісінде шыншылдық пен әділеттілікті берік ұстанғанда ғана айналасында сенімге толы орта қалыптасады. Ал сенім бар жерде даму болады. Сондықтан да адалдық принципі – қоғамның алға жылжуының негізгі қозғаушы күші.

Бүгінгі таңда сыбайлас жемқорлыққа қарсы мәдениетті қалыптастыру бағытында мемлекет тарапынан да, қоғамдық ұйымдар тарапынан да ауқымды жұмыстар атқарылуда. Алайда жемқорлықпен күрес тек құқықтық шаралармен шектелмейді. Ең тиімді әдіс – адам санасына адалдықты сіңіру, жас ұрпақтың бойына әділдік пен жауапкершілікті ерте жастан дарыту. Мектептерде, колледждер мен жоғары оқу орындарында өткізіліп жатқан түрлі ақпараттық акциялар, дәрістер мен байқаулар осы мақсатты көздейді.

Адал қоғам – азаматтардың өз құқықтары мен міндеттерін түсінуінен басталады. Заңға құрмет көрсетіп, кез келген жағдайда әділдікті таңдаған адам өзінен кейінгі буынға өнегелі үлгі қалдырады. Бүгінгі дұрыс шешім – ертеңгі таза қоғамның негізі. Сондықтан пара беруден де, пара алудан да бас тарту – әрбір адамның жеке таңдауы ғана емес, заң талабы әрі азаматтық ұстаным.

Әрқайсымыз өз өмірімізде адалдықты таңдасақ, қоғамның болашағы да жарқын болмақ. Таза ой, адал еңбек, әділ шешім – мемлекет дамуының кепілі. Сондықтан «таңдауымыз – адал қоғам» деу жай ұран емес, нақты әрекетке шақыру.

Адалдыққа негізделген қоғам құру жолында баршамыздың бірігуіміз – бүгінгі күннің басты міндеті. Себебі шынайы өзгеріс әр азаматтың жеке жауапкершілігінен басталады. Қордай ауданы әкімдігінің ішкі саясат бөлімінің мемлекеттік — әлеуметтік тапсырысы аясында әзірленді.