Денсаулық сақтау саласындағы өзекті мәселелер талқыланды
«AMANAT» партиясы Жамбыл облыстық филиалы жанындағы Білім мен денсаулық сақтау мәселелері жөніндегі аймақтық кеңестің отырысында өңір медицинасын дамытуға қатысты маңызды мәселелер қаралды.
Кеңес аясында денсаулық сақтау нысандарындағы күрделі жөндеу, цифрландыру үдерісін жеделдету, жасанды интеллектті енгізу, аудандарда телемедицина арқылы онлайн-консультациялар санын арттыру мәселелері талқыланды.
Жамбыл ауданы әкімінің орынбасары Нұрлан Несіпбектің мәліметінше, ауданда 12 медициналық нысанды жөндеу көзделген, соның ішінде 8 нысанның жөндеу жұмыстары аяқталған. Алайда, 20 жылдан астам уақыт жөндеу көрмеген аудандық орталық аурухана жоспарда жоқ болып шықты. Бұл – нысанның аумақтық іс-шаралар тізіміне енбеуіне байланысты.
Сондай-ақ облыстық денсаулық сақтау басқармасы басшысының орынбасары Ерік Мұсабаевтың баяндамасы тыңдалды. Кеңес мүшелері интернет сапасының төмендігі, цифрлық инфрақұрылым мен бейнебақылау жүйелерінің жеткіліксіздігі секілді мәселелерге назар аударып, нақты ұсыныстарын білдірді.
Барлық ұсыныстар партия бақылауына алынып, тиісті органдарға жолданады.
