Республикалық ғылыми жобалар конкурсы
Жалпы білім беретін пәндер бойынша республикалық ғылыми жобалар конкурсының облыстық кезеңі өтті
2025 жылдың 19 қазан күні Жамбыл облысы әкімдігінің білім басқармасының «Жамбыл дарыны» аймақтық ғылыми-практикалық орталығының ұйымдастыруымен Абай атындағы дарынды балаларға арналған мамандандырылған қазақ тілі мен әдебиетін тереңдете оқытатын мектеп-гимназиясының базасында 9-11 сынып оқушылары арасында жалпы білім беретін пәндер бойынша республикалық зерттеу жобалар конкурсының облыстық кезеңі өтті.
Байқаудың мақсаты: оқушылардың зияткерлік әлеуетін қалыптастыруға ықпал ету болып табылады.
Байқаудың міндеттері: оқушылардың ғылыми-зерттеу және оқу-танымдық қызметін ынталандыру, ең талантты және дарынды зерттеушілерді іріктеу және қолдау, оқушылардың үздік зерттеу жетістіктері мен өнертабыстарын көрсету және насихаттау, оқушылардың зияткерлік әлеуетін дамыту мәселелеріне қоғамның назарын аудару және ғылыми-зерттеу ресурстарын тарту.
Конкурсқа 16 секцияда 4 бағыт бойынша жұмыстар ұсынылды:
І бағыт – «Ғылыми-техникалық прогресс экономикалық өсудің негізгі буыны ретінде» — секциялар: физика, техника, Жер және ғарыш туралы ғылым.
ІІ бағыт — «Экономикалық және әлеуметтік үрдістерді математикалық модельдеу» — секциялар: математика, қолданбалы математика, информатика, экономика.
ІІІ бағыт -«Салауатты табиғи орта- «Қазақстан – 2030» стратегиясын жүзеге асырудың негізі» — секциялар: химия, биология, қоршаған ортаны қорғау және адам денсаулығы.
IV бағыт — «Қазақстанның тарихи ескерткіштері және перспективалы туристік маршруттар» — секциялар: тарих, өлкетану, этномәдениеттану, тіл білімі, адам және қоғам, әдебиет.
Конкурстың облыстық кезеңіне Жамбыл облысының барлық аудандары мен Тараз қаласынан және білім басқармасына қарасты облыстық білім беру ұйымдарынан 508 оқушы қатысып, бақтарын сынады.
Сондай-ақ қатысушылардың зерттеу жұмыстарын өңіріміздің жоғарғы оқу орындарының оқытушы – ғалымдары бағалады.
Конкурстың бірінші турының жеңімпаздары мен жүлдегерлері Жамбыл облысы әкімдігінің білім басқармасының І, ІІ, ІІІ дәрежелі дипломдарымен және медальдарымен марапатталды.
Байқау қорытындысы бойынша 186 оқушы жеңімпаз атанып, I — орынды 38 оқушы, II — орынды 52 оқушы, III — орынды 96 оқушы иеленіп, жеңімпаз атанды.
Жеңімпаз оқушыларды жүлделі орындарымен құттықтаймыз!