АҚШ-та Трамптың инаугурациясынан кейін мигранттарға қарсы рейдтер басталмақ

On Янв 18, 2025

21 қаңтарда АҚШ-та мигранттарға қарсы рейдтер басталады. Рейдтер бірінші Чикагода жүргізіледі, — деп хабарлайды Massaget.kz тілшісі The Wall Street Journal-ға сілтеме жасап.

АҚШ-тағы мигранттарға қарсы рейдтер президент Дональд Трамптың инаугурациясынан кейін басталады. Алғашқы рейдтер Чикагода, кейін Нью-Йоркте, Лос-Анджелесте, Денверде және Майамиде өтеді. Бұрын қылмыс жасаған адамдарға ерекше назар аударылмақ. Бұған АҚШ иммиграциялық және кедендік бақылауының барлығы 200-ге жуық қызметкері қатысады.

Трамп сайлау науқаны кезінде мигранттарды жаппай депортациялауға уәде берді. Бұған дейін елден заңсыз иммигранттарды шығарып жіберу үшін тіпті әскери ұшақтар да іске қосылатыны хабарланған болатын. Осылайша Трамп бақылаусыз көші-қонмен күресіп, экономика мен сыртқы саясат стратегиясын орындамақ.

Президент сайлауы туралы не белгілі?

2024 жылы 5 қарашада Америка Құрама Штаттарында президент сайлауы өтті. Негізгі кандидаттар республикашылар атынан Дональд Трамп және демократтар атынан Камала Харрис болды. Бұл — елдің 47-ші президенті сайланатын 60-шы президенттік сайлау.

Трамп Вашингтон уақыты бойынша түнгі сағат екіде (Астана бойынша сағат 12:00-де) сайлаудың жеңімпазы деп жарияланды. Ол барлық негізгі штатта жеңіске жетті.

Еске салайық, бұған дейін АҚШ-тағы алғашқы сайлау учаскелері жабылғаны хабарланды. Кейін Associated Press мынадай статистика келтірді: Трампта 230 дауыс, Харристе 187 дауыс. Мұндай деректерді «Америка дауысы» да келтірді: 230 және 179 дауыс.

Сонымен қатар Трамп негізгі жеті штаттың алтауында көш бастады.

Артынша Дональд Трамп Флоридада жақтастарының алдында сөз сөйлеп, сайлаудағы жеңісін жариялады.

Фото: depositphotos.com

https://massaget.kz/news/aksh-ta-tramptyin-inauguratsiyasyinan-keyn-migranttarga-123933/?fbclid=IwY2xjawH4lPtleHRuA2FlbQIxMQABHWJCqimdXXIt1dO2Mi4Z-jqJyeRv3Ozx0nu8hhA8zVO1M2_xlcQ0wEmrjQ_aem_Ork2YMSERySUAYwwiDsUcQ