Ербол Қарашөкеев еңбек ардагеріне құрмет көрсетті

1 қазан – Халықаралық қарттар күніне орай Жамбыл облысының әкімі Ербол Қарашөкеев еңбек ардагері, көпбалалы ана Күлән Байділдаеваның шаңырағына барып, құрмет көрсетті.

Облыс әкімі ұрпақ тәрбиесіне елеулі үлес қосқан Күлән Исаққызының көпжылдық еңбегіне тоқталып, ақжарма тілегін жеткізді.

Бұдан бөлек, ардагер ұстаздың өмірлік жолдасы, қоғам қайраткері Жұмабек Сапаралиевтің де ел ертеңі үшін жасаған игі істерін кейінгі ұрпақ ұмытпайтынын айтты.

Күлән Байділдаева Байзақ ауданының тумасы. 1957 жылы Абай атындағы педогогикалық училищені аяқтады. Ы.Сүлейменов атындағы №37 мектепте ұзақ жылдар бойы жемісті қызмет атқарып, зейнетке шыққан. Ақ жаулықты әже 10 баланы өмірге әкелген. Бүгінде 50-ден аса немере-шөбересіне тәлім-тәрбиесін беріп, қызығын көріп отыр.

Еңбек ардагері аймақ басшысына алғыс айтып, ақ батасын берді.

Бұл күні облыс әкімінің орынбасарлары, облыстық мәслихат төрағасы өңірдің әлеуметтік-экономикалық дамуына сүбелі үлес қосқан қазыналы қарттарды мерекемен құттықтап, ілтипат білдірді.

Жамбыл облысы әкімдігі