«5 миллион бермесек, базардан қуып шығады»: Алматыда сатушылар шу шығарды

Алматыда «Кенжехан» базарының 1,5 мың сатушысы «5 миллион бермесек, бізді базардан қуып шығады» деп алаңдап отыр. Олардың айтуынша, жазда сауда нысаны күрделі жөндеуден өтеді. Ал оның ақшасын базар басшысы осындағы кәсіпкерлерден 1 айдың ішінде өндіріп алмақшы деп хабарлады turkystan.kz КТК арнасына сілтеме жасап. 

«Тақалған кезде тағы «10 мың доллар керек» дейді. Расында бір айда 10 мың долларды іс жүзінде ешкім шығара алмайды. Бүйту керек қой, бірінші, мен өзім заңды оқығанмын, шарт әкелуі керек, әкімдік рұқсаты керек. Қызыл сызықта бар ма, жоқ па?» – дейді саудагер Қадырәлі Жұмадүрді.

Кезінде контейнерді сатып алған кәсіпкерлер тағы да шығынға батайын деп тұр. Бір жыл бұрын ауысқан базар басшылығы ешкімді жарылқамасы белгілі.

«2014 жылы 12 500 доллардан бәріміз сатып алғанбыз. Енді бүгін контейнерлерімізді кері сатып алуымыз керек екен. Мысалы, менің екі орным бар, 20 мың долларға бір айдың ішінде аяқасты тауып бере алмаймын. Өйткені алдымызда маусым келе жатыр», – дейді саудагер Ануза Дәуітова.

«Кенжехан» базары 2014 жылы ашылған. Негізінен, аяқ-киім, киім-кешек және құрылыс материалдарын сатады. Қосқабатты контейнерлерден соғылған.

Саудагерлер базар әкімшілігіне шамамен 50 мың, ал оны сатып алған қожайынға 150 мың теңге төлейді. Сонда ай сайынғы төлем орташа 200 мың теңгеден асады.

Былтыр келген жаңа басшыны ешкім көрмеген. Тегін ғана біледі. Оның орнына өзін  атқарушы директормын деген базар өкілі келген. Күрделі жөндеуге 1 600 саудагерден 5 миллион теңгеден ақша жиналатынын айтып отыр. Бұл – 8 миллиард теңге. Ал модернизацияның өзіне 10 миллиард жұмсалса, соның 80 пайызы кәсіпкерлердің қалтасынан шыққалы тұр.

«Үкімет ақша береді, бәленбай миллиард модернизацияға, қарызға деген, бірақ несиені әзірге бермей жатыр. Оған сол үшін халық өзі ақшасын шығарады. Бірақ әр адаммен келісімшарт жасаймыз», – деді «Кенжехан» базарының атқарушы директоры Ардақ Тажиев.