Ұлттық спорт күні: Жазасын өтеушілер өзара мықтыны анықтады
Жамбыл облысы бойынша Қылмыстық-атқару жүйесі департаментінің №25 мекемесінде Ұлттық спорт күніне орай сотталғандар арасында спорттық іс-шара өткізілді. Жазасын өтеуші азаматтар қазақ күресі және асық ату ойындары бойынша сайысқа түсті.
– «Ұлттық спорт күніне» орай жазасын өтеушілер арасында ұлттық спорт түрлерін дәріптеп, оларды қоғамға қайта бейімдеу мақсатында спорттық жарыс өтті. Қазіргі кезде дәстүрлі спорт түрлеріне деген ықылас сотталғандар арасында ғана емес, қызметкерлер арасында да артып келеді. Бұл да заңдылық, себебі ежелден келе жатқан ұлттық спорт түрлерімен айналысқанда біз ата-бабаларымыздың даналығы мен сұлулығын паш ететін мәдени құбылыс тудырамыз. Сотталған азаматтарға бұндай шараны ұйымдастыру – бізде ғаламдық деңгейде мақтан тұтатын мұра бар екенін түйсініп, мықты рух пен ерік-жігер тұрғысынан үлгі тұтатын бабаларымызды еске түсіруге себеп, – дейді мекеме бастығы, әділет подполковнигі Бекзат Ортаев.
Қатысушылар арасында топ жарып, жақсы нәтиже көрсеткен жазасын өтеушілер марапатталып, ұйымдастырушыларға өз алғыстарын білдірді.
– Мен мекемеде өтетін түрлі дәрістермен қатар, спорттық іс-шараларға белсене қатысып келемін. Қателеспейтін пенде болмайды, алайда, бізді қателесті екен деп сыртқа теппей, керісінше бізге қамқорлық танытып жатқан мекеме ұжымына алғысымды білдіремін, – дейді жазасын өтеуші азамат.
