Бейне байланыс арқылы балаларымен қауышты
1 маусым күні бүкіл әлемде балаларды қорғау күні аталып өтіледі. Балаларды қорғау күні — олардың денсаулығын сақтау, болашақ ұрпаққа білім мен тәрбие беру жөніндегі барша әлемдегі озық пікірлердің тоғысқан арнасы десек, артық айтқандық емес.
Бұл күні бүлдіршіндерді қорғау шаралары ғана емес, олардың көңіл-күйлерін көтеретін түрлі шаралар ұйымдастырылады. Сондықтан, балақайлар бұл күнді асыға күтеді.
Ата-анасының тосын сыйы, аға-әпкесі тарту еткен түрлі тәттілер олардың жанарында от ойнатып, көңілдеріне қуаныш сыйлайды. Ал әкелерін көптен көрмеген балалар бұл күні асқар тауымен қауышып жатса, ол бақытты сөзбен жеткізу әсте мүмкін емес шығар…
Жамбыл облысы бойынша қылмыстық-атқару жүйесі департаментінің ЖД-158/4 мекемесінде
жазасын өтеп жатқан азаматтар жаздың бірінші күнімен бірге келіп жеткен
халықаралық балалар күні мерекесінде өз балаларымен онлайн байланыс арқылы табысып, сағыныштарын басуға мүмкіндік алды. Мекеменің тәрбие бөлімінің қызметкерлерінің ұйытқы болуымен өткен бейне байланыс сеансында сотталған азаматтар бала-шағасымен қауышып, мерекесімен құттықтады.
Әбдіғани Құдайқұлов,
ЖД-158/4 мекемесінің сотталғандар арасында тәрбие және әлеуметтік психологиялық жумысын жүргізу бөлімінің бастығы аділет капитаны