ЖАМБЫЛДА АУЫЛ ДАМУЫНА 81,9 МЛРД ТЕҢГЕ ЖҰМСАЛДЫ: 1073 ЖОБА ІСКЕ АСТЫ!
«AMANAT» партиясы Жамбыл облыстық филиалы жанындағы «Өңірлік даму» жөніндегі аймақтық кеңестің кезекті отырысында өңірдің әлеуметтік-экономикалық даму барысы мен «Ауыл – Ел бесігі» жобасының нәтижелері кеңінен талқыланды.
2025 жылы Жамбыл облысының жалпы өңірлік өнімі 3,3 трлн теңгені құрап, экономикалық өсім 104,9%-ға жетті. Ал 2026 жылдың алғашқы төрт айындағы қысқа мерзімді экономикалық өсім 117,9% деңгейінде қалыптасты.
Өңдеу өнеркәсібі – 128,7% Құрылыс – 127,3% Көлік саласы – 117,5% Ауыл шаруашылығы – 102,3%
Биылғы төрт айда өңірге 277,2 млрд теңге инвестиция тартылып, бұл көрсеткіш өткен жылмен салыстырғанда 38,3%-ға артты.
«Ауыл – Ел бесігі» жобасы аясында 2019-2025 жылдары 189 ауылда 81,9 млрд теңгеге 1073 жоба жүзеге асырылды.Нәтижесінде:
71 білім нысаны жаңғыртылды; 35 денсаулық сақтау жобасы іске асырылды; 105 мәдениет және спорт нысаны пайдалануға берілді; 892 шақырым ауылішілік жол жөнделді.
Жүргізілген жұмыстардың арқасында ауыл тұрғындарын әлеуметтік игіліктермен қамтамасыз ету деңгейі 54,8%-дан 72,7%-ға дейін өсті.Сонымен қатар, биыл өңірлік даму тұжырымдамасы аясында 6,9 млрд теңгеге 19 ірі жоба жүзеге асырылуда. Оның ішінде мектептерге жапсарлас ғимараттар, спорт кешендері, мәдениет үйлері мен автокөлік көпірінің құрылысы бар.
Кеңес барысында өңірдегі өзекті мәселелерді партиялық бақылауда ұстап, жергілікті атқарушы органдармен бірлесіп жүйелі жұмыс жүргізу қажеттігі атап өтілді.