Жамбыл облысының Полиция департаменті сыбайлас жемқорлық көріністеріне қарсы ашық күрес жүргізуде

Жамбыл облысының Полиция департаменті сыбайлас жемқорлық көріністеріне қарсы ашық күрес жүргізуде. Облыстық ПД Өзіндік қауіпсіздік басқармасымен полиция қатарында сыбайлас жемқорлық әрекеттеріне жол бермеу, сондай-ақ полиция қызметкерлеріне пара беру деректерінің жолын кесу бойынша мақсатқа бағытталған жұмыстар жүргізілуде.
Пара алу және беру, сондай-ақ парақорлық бойынша делдалдық жасағаны үшін де қылмыстық жауаптылық көзделетінін атап өткен жөн. Мәселен, лауазымды адамға пара бергені үшін ҚР ҚК 367-бабы бойынша 7 жылдан 12 жылға дейінгі мерзімге бас бостандығынан айыру түріндегі жауапкершілік қарастырылады.
Ағымдағы жылы ПД Өзіндік қауіпсіздік басқармасына 7 полиция қызметкері өздеріне сыйақы ұсынған азаматтардың заңсыз әрекеттері туралы жүгінді. Алайда, лауазымды адамға пара берудің салдары туралы түсіндіру жұмыстарын жүргізгеннен кейін азаматтар өздерінің заңсыз әрекеттерінен бас тартқан.
2021-2022 жылдар аралығында ІІО қызметкерлеріне пара бергені үшін ПД Өзіндік қауіпсіздік басқармасымен жеті азамат қылмыстық жауапкершілікке тартылды.
Естеріңізге сала кетсек, Жамбыл облысының Полиция департаменті Өзіндік қауіпсіздік басқармасында 8-7262-45-46-52, 8-701-032-22-35 сенім телефондары жұмыс істейді, осыған қатысты азаматтар да, полиция қызметкерлері де сыбайлас жемқорлық көріністерінің барлық деректері бойынша жүгіне алады.