ОҚУШЫЛАР МЕН СТУДЕНТТЕР АСА ҚҰНДЫ ҚҰЖАТТАРМЕН ТАНЫСАДЫ

On Сен 21, 2022

Еліміздің мектеп оқушылары мен ЖОО студенттері саяси қуғын-сүргін құрбандары туралы архивтегі аса құнды құжаттарды, ХХ ғасырдың 20, 30-жылдарындағы ашаршылыққа қатысты материалдарды, жастар қозғалысының тарихын, Қазақстан Республикасы Тәуелсіздігінің қалыптасуын және басқа да тарихи фактілерді куәландыратын құжаттармен танысып, білімін жетілдіре алады.

Бұл – «Архив және болашақ ұрпақ» атты республикалық жоба аясында мүмкін болып отыр. 21 қыркүйекке жоспарланған ауқымды шара 400-ден астам түрлі форматтағы іс-шараларды қамтиды.

ҚР Мәдениет және спорт министрлігінің бастамасымен жүзеге асатын республикалық жоба аясында еліміздің барлық мемлекеттік архивтерінде Ашық есік күні өтеді.

«Жас азаматтар үшін музейлер мен кітапханалар ғана емес, архивтер де маңызды тарихи оқиғаларды, ұлттық дәстүрді, Қазақстанның көрнекті қоғам және мемлекет қайраткерлерінің қызметін зерделеуге арналған орталыққа айналуға тиіс. Өз еліміздің тарихына үңіліп, сирек кітаптарды реставрациялау, қолжазбаларды сканерлеу, саяси қуғын-сүргін құрбандары туралы архив құжаттарын өз көздерімен көру маңызды деп ойлаймын. Біз әр түрлі жастағы балаларды қамтып, оқушылар мен студенттерге аса құнды құжаттарға қол жеткізуге мүмкіндік беруіміз керек», – деп атап өтті Мәдениет және спорт министрі Дәурен Абаев.