Оқушылар арасында өткен «Адалдықтың бастауы – балалықтан» атты сурет байқауы өз мәресіне жетті

Қордай ауданында мектеп оқушылары арасында ұйымдастырылған «Адалдықтың бастауы – балалықтан» атты сурет байқауы өз мәресіне жетті. Байқаудың мақсаты – жас буынның бойында адалдық, әділдік, шыншылдық сияқты адамгершілік құндылықтарды қалыптастыру, балалардың шығармашылық қабілетін дамыту және сыбайлас жемқорлыққа қарсы мәдениетті ерте жастан сіңіру болды.

Байқауға аудан бойынша білім беру мекемелерінің оқушылары белсенді қатысып, өз қиялымен адал қоғамның бейнесін қағаз бетіне түсірді. Балалар суреттерінде әділдік, еңбексүйгіштік, достық, қоғамға пайда тигізу және парасатты өмір салтын ұстану тақырыптарын түрлі тәсілдермен көрсете білді. Әр жұмыс өзіндік идеясымен, бояулар үйлесімділігімен және көркемдік шешімімен ерекшеленді.

Қазылар алқасы суреттерді мазмұнның тереңдігі, көркемдік тұтастық, шығармашылық көзқарас және тақырыпқа сәйкестік бойынша бағалап, үздік деп танылған бірқатар оқушыны анықтады. Жеңімпаздар мен жүлдегерлер арнайы дипломдармен және бағалы сыйлықтармен марапатталды.

Іс-шара барысында ұйымдастырушылар жасөспірімдерге адалдық пен әділдіктің қоғам үшін маңызды екенін түсіндіріп, бұл құндылықтарды қалыптастырудың дәл мектеп қабырғасынан басталатынын атап өтті. Балалармен өткізілген әңгімелер мен түсіндіру жұмыстары жас буынға дұрыс бағыт беруге ықпал етті.

«Адалдықтың бастауы – балалықтан» байқауы өскелең ұрпақтың санасында парасаттылық қағидаттарын қалыптастыруға бағытталған маңызды жобалардың бірі болып табылады. Мұндай шаралар балалардың дүниетанымын кеңейтіп қана қоймай, оларды қоғамда белсенді, жауапты азамат болуға жетелейді.

Қордай ауданы әкімдігінің ішкі саясат бөлімінің мемлекеттік–әлеуметтік тапсырысы аясында әзірленді.