АУЫЛ ШАРУАШЫЛЫҒЫ — АСЫРАУШЫ САЛА

Шара облыс басшысы Ербол Шырақпайұлының бейнеқұттықтауымен ашылып, сала мамандарын облыс әкімінің Құрмет, Алғыс хатымен және «Облысқа сіңірген еңбегі үшін», «Сарысу ауданына сіңірген еңбегі үшін» төсбелгі және аудан әкімінің Құрмет, Алғыс хаттары, бағалы сыйлықтармен марапаттадым. Сонымен бірге, ауылшаруашышылық саласының жұмысшыларына шипажайларға жолдама табысталды.

Мемлекет басшысы Қасым-Жомарт Тоқаев «Ауыл шаруашылығын дамыту — негізгі мәселенің бірі. Ауылдың жағдайын жақсарта алмасақ бәрімізге сын» деп, осы салаға үлкен мән берді.Елдің дамуы, ауылдардың дамуымен тікелей байланысты. Біздің Сарысу — өндірісі мен экономикасы қатар дамыған аудан. Ауданда 1792 шаруа қожалығы тіркелген. Биылғы жылы өндірілген өнім көлемі — 22 млрд. теңгеден асты. Жыл санап егістік алқабының көлемі де ұлғаюда, алайда, биыл өңірдегі құрғақшылыққа байланысты өнім көлемі аз болды. Жаңа технологияны тарта отырып, өнім көлемін арттыру жұмыстарын қолға аламыз. Төрт түліктің басы артып, сүт пен ет өнімдерінің көлемі де артуда.

Халықтың тұрмысын арттыру мақсатында жолға қойылған «Ауыл аманаты» жобасының жемісін ауыл тұрғындары көруде. Тұрғындар есік алды, ауыл сыртындағы жерлерін игеріп, мал басын көбейтіп, қосалқы шаруашылықтарын дамытуда.

Жыл санап ауыл шаруашылығы техникалары жаңартылып, биылдың өзінде 340,0 млн. теңгеге 48 дана техника алынса, алда 42 дана техника алу жоспарда. Шаруалардың тірлігін дөңгелетуге мол мүмкіндік беретін субсидия алу да жолға қойылған. Биыл шаруалар 71.7 млн теңге субсидия алды.

Осындай жүйелі жұмыспен тынымсыз еңбектің нәтижесінде ауданымыздың ауыл шаруашылық саласының болашағы да жарқын болады.

Шара барысында шаруа қожалықтардың қызметкерлері арасында спорттық жарыстар мен ауыл шаруашылық өнімдерінің көрмесі мен жәрмеңкесі, техникалар көрмесі және облысқа танымал өнер жұлдыздарының қатысуымен гала концерт өтті.

Құрметті сала қызметкерлері мен ардагерлері!

Баршаңызды кәсіби мерекемен құттықтай отырып, дендеріңізге саулық, отбасыларыңызға амандық тілеймін!