Астанада бірнеше елдің конституциялық бақылау органдарының өкілдері бас қосты

gov.kz

https://turkystan.kz/article/266389-astanada-birnese-eldin-konstituciialyq-baqylau-organdarynyn-okilderi-bas-qosty
Астанада «Конституция және мемлекеттілік: құқық пен болашақ диалогы» халықаралық ғылыми-практикалық конференциясы басталды, деп хабарлайды turkystan.kz.

Аталған іс-шара Конституцияның 30 жылдығына орай ұйымдастырылып отыр.

28 тамызда конференцияның алғашқы сессиясы «Конституциялық теңдік кепілдіктері, қорғану құқығы және әділ сот төрелігіне қол жеткізу» тақырыбында өтті.

Сессияны аша отырып, Әділет министрі Ерлан Сәрсембаев конституциялық институттарды нығайту, заң үстемдігін қамтамасыз ету және жеке адамның құқықтарын қорғау – мемлекеттік саясаттың басты басымдықтары екенін атап өтті.

«Конституция – ұлттың мәдени кодының бөлігі. Ол әрбір азамат өз құқықтарын ғана емес, сонымен бірге қоғам мен мемлекет алдындағы жауапкершілігін де түсінетін бірлік сезімін қалыптастырады.

Қазіргі заманның сын-қатерлері мемлекеттік институттардан да, азаматтардың өздерінен де тұрақтылықты талап етеді. Осындай жағдайда Конституция – сенім құралы ретінде алға шығады.

Бұл тұрғыда 2022 жылғы конституциялық реформа аясында қайта құрылған Конституциялық Соттың орны ерекше. Азаматтың тікелей жүгіну мүмкіндігі – бұл жай ғана жаңа институт емес, құқықтар мен бостандықтардың кепілдіктерін нығайтуға жасалған сапалы жаңа қадам. Конституциялық Сот адам мен Негізгі заңның ұштасу нүктесіне айналып, конституциялық нормаларды әділеттіліктің жеке тәжірибесіне айналдырады», – деді министр

Сессия барысында конституциялық кепілдіктерді іске асыруға қатысты өзекті мәселелер, соның ішінде заң алдындағы теңдік, сот арқылы қорғану құқығы және әділ сот төрелігіне қолжетімділік тақырыптары талқыланды.

Талқылауға Парламент депутаттары, Конституциялық Сот, Армения, Қырғызстан, Тәжікстан және Өзбекстан конституциялық бақылау органдарының өкілдері, халықаралық сарапшылар, халықаралық ұйымдар, ғылыми қауымдастық және азаматтық сектор өкілдері қатысты.

Ауқымды іс-шараның өткізілуі құқықтық мәдениетті нығайтуға және конституциялық нормаларды іске асырудың негізі болып табылатын «Заң және тәртіп» идеологиясын дамытуға бағытталған.

Конференция жұмысы 29 тамызда Тәуелсіздік сарайында жалғасады. Бұл күні конституциялық тұрақтылық, заң шығару қызметінің сапасын арттыру және ұлттық конституциялық бірегейлікті қалыптастыру мәселелеріне арналған пленарлық және панельдік сессиялар өтеді.

Толық нұсқасына гиперсілтеме беруді ұмытпаңыз: https://turkystan.kz/article/266389-astanada-birnese-eldin-konstituciialyq-baqylau-organdarynyn-okilderi-bas-qosty