Аралас жекпе-жектің сайыпқыраны қазақстандық Қуат Хамитов (18-6-1) өзінің таяу уақыттағы жоспарымен бөлісті.
Хамитов Instagram-да 27 желтоқсанда Fight Nights Global турниріне қатысатындығын жазды. Әзірге оның қарсыласы белгісіз. Бұл жарыста ресейлік Роман Копылов (6-0) пен швейцариялық Ясубей Эномото (18-10) орта салмақтағы чемпиондық титулға таласады. Атап өтсек, Қуат бір жылдан бері ешкіммен кездескен жоқ. Ол соңғы жекпе-жегін 2017 жылы ирландық Питер Куиллимен (10-4-1) өткізген еді. Ол жолы төрешілердің басым даусымен жеңіске жеткен болатын. Бірақ Кулиллидің командасы апелляцияға беріп, тәуелсіз комиссия ұпай санын қайта есептеп, айқасты тең өтті деп өзгертті.