Ауылдағы балалар да сапалы білім алуға лайық

Қордай ауданында аталған жоба аясында Қарасу және Қаракемер ауылдарында 300 орындық жаңа мектептердің құрылысы жүріп жатыр. Қазір нысандарда құрылыс жұмыстары аяқталуға жақын. Жаңа оқу жылында бұл мектептер пайдалануға беріліп, ауыл балалары заманауи талаптарға сай білім ордасына қадам баспақ.

Бұл жайында Ақпарат және қоғамдық даму басқармасының ұйымдастыруымен өткен баспасөз туры кезінде мәлім болды.

Қарасу ауылындағы 300 орындық мектептің құрылысы 2024 жылдың көктемінде басталған. Бұл – ауыл үшін үлкен жаңалық. Бұған дейінгі мектеп ғимараты ескірген, талапқа сай келмейтін еді. Жаңа мектептің құрылысына «Samruk-Kazyna Construction» АҚ тапсырыс беруші ретінде бекітілген. Бас мердігер – «Rise Capital» ЖШС.

Жаңа білім ордасында оқушылар үшін кең әрі жарық сыныптар, заманауи спорт залы, компьютер сыныптары, зертханалар мен кітапхана қарастырылған. Сонымен қатар, ерекше білімді қажет ететін балалар үшін қолжетімді орта жасалады. Қазіргі таңда ғимараттың негізгі құрылысы аяқталып, ішкі әрлеу және инженерлік жүйелерді орнату жұмыстары жүріп жатыр. Мектеп ауласы абаттандырылып, спорт және ойын алаңдары орнатылуда.

Қаракемер ауылындағы мектеп құрылысы 2023 жылдың мамыр айында басталған. Мұндағы құрылыс жұмыстарын «Тараз строй 2004» ЖШС жүргізіп жатыр. Бұл мектеп те 300 оқушыға арналған. Құрылыс басынан бастап жоспарлы әрі жоғары қарқынмен жүргізіліп келеді. Қазіргі кезде ішкі жұмыстар мен технологиялық жүйелерді орнату, жарықтандыру және сыртқы абаттандыру бойынша жұмыстар атқарылуда.

Мектеп тек білім беру нысаны ғана емес, ауыл балаларының дамуына арналған толыққанды орталық болады. Мұнда оқу үдерісінен бөлек, түрлі үйірмелер, спорт секциялары мен шығармашылық бағыттағы жұмыстарға да кең мүмкіндік берілмек. Бұл – ауылдағы әрбір баланың әлеуетін ашуға арналған нақты мүмкіндік.

Мердігер ұйым өкілдері жобаның сапасына үлкен мән беріп отыр. Материалдар уақытылы жеткізіліп, жұмыс күші жеткілікті. Құрылыс барысы кезең-кезеңімен бақылауда.

«Rise Capital» ЖШС өкілі: «Жобаның маңызын түсіне отырып, сапа мен мерзімді басты назарда ұстап отырмыз. Әрбір бөлшекке жауапкершілікпен қарап, балалардың қауіпсіздігі мен жайлылығын ескереміз», – дейді.

Ауыл тұрғындары да бұл өзгерісті қуанышпен қабылдауда.

Қаракемер ауылының тұрғыны, Амангелді Тайсүгіров: Президентіміздің тапсырмасына сәйкес ауылымызда «Жайлы мектеп» жобасы аясында жаңа, заманауи мектеп салынып жатыр. Жаңа оқу жылында балаларымыз осы жарық, кең, барлық жағдайы жасалған мектепте оқитын болады. Бұл – біз үшін үлкен қуаныш, көптен күткен жаңалық. Бұрынғы мектебіміз ескі әрі тар болатын. Енді балалардың сапалы білім алып, жайлы ортада оқуы үшін барлық мүмкіндік жасалмақ. Осындай қамқорлық үшін Мемлекет басшысына алғысымыз шексіз! — деді ол өз сөзінде.

Қорыта келе «Жайлы мектеп» ұлттық жобасы жай ғана құрылыс емес, ауыл болашағына салынған инвестиция.

Мектептің әрбір бөлмесі, ауласы, жабдығы – баланың дамуына бағытталған. Мұнда тек білім ғана емес, тәрбие, денсаулық, шығармашылық, спорт пен қауіпсіздік – бәрі ескерілген.

Жоспар бойынша, нысандар 2025 жылдың қыркүйек айына дейін пайдалануға беріледі. Осылайша, жаңа оқу жылын ауыл балалары жаңа мектепте, жаңа серпінмен бастамақ.