Ұлттық спорт түрлерінен турнир өтті

Бүгін – Наурызнама онкүндігі аясында Ұлттық спорт күні. Осыған орай Жамбыл облысы бойынша Қылмыстық атқару-жүйесі департаментіне бағынысты мекемелердің қызметкерлері арасында ұлттық спорт түрлерінен жарыс өтті.

Жарыстың ашылу салтанатына департамент бастығы, әділет подполковнигі Жаныбек Қосжанов қатысып, құттықтау сөз сөйледі. Ұлттық спорттың ел өміріндегі алар орнының ерекшелігіне, еліміздің ұлттық ойындары салауатты өмір салтын қалыптастырып қана қоймай, елге, салт- дәстүрге, тарихқа деген құрметті асқақтатып, патриоттық рухты көтеретіндігіне тоқталған Жаныбек Жамалбекұлы жарысқа қатысушыларды мерекемен құттықтап, сәттілік тіледі.

Ұлыстың ұлы күні қарсаңында өткізілген жарыста қатысушылар спорттың қазақ күресі, арқан тарту және қол күресі түрлерінен сынға түсті. Жарысқа №25 мекеменің атынан әділет капитаны Жансерік Әбдіқаппаров, әділет аға лейтенанты Азамат Әліпбек, әділет аға лейтенанты Дарын Ақжол мен әділет аға лейтенанты Қуандық Қуанышұлы қатысты.

Жарыс барысында қатысушылар өздерінің бар күш-қайратын салып, бәсекелестерін басып озуға тырысты. Әсіресе қазақ күресі мен қол күресінен спортынан сынға түскен ер азаматтар намысты қолдан бермеуге тырысып, ойын өте тартысты болды. Ал арқан тартысқа қатысқан командалар өздерінің топпен жұмыс істеудегі шеберліктерін көрсетті.

Тартысқа толу турнирде төрешілердің әділ шешімімен қорытындыланып, №25 мекеменің намысын қорғаған әділет капитаны Жансерік Әбдіқаппаров қазақ күресінен ауыр салмақта І орынға ие болды. Сол секілді Дарын Ақжол қазақ күресінен жеңіл салмақта жауырыны жерге тимей, жеңімпаз атанды.