Мойынқұмда Жас сайлаушылардың алғашқы форумы өтті
Мойынқұм жастары үшін ерекше маңызға ие шара – Жас сайлаушылар клубының алғашқы форумы ұйымдастырылды. Форумға аудан жастары, білім беру ұйымдарының өкілдері, мемлекеттік қызметкерлер және қоғамдық ұйым жетекшілері қатысты.
Шараның басты мақсаты – жастардың сайлауға қатысу белсенділігін арттыру, азаматтық жауапкершілігін күшейту және саяси мәдениетін қалыптастыру.
Форум Мойынқұм ауданының әкімі Ермек Амангелдіұлы Карентаевтың құттықтау сөзінен басталды. Сонымен қатар Жамбыл облыстық аумақтық сайлау комиссиясының мүшесі Мейіржан Ермекбайұлы Сембеков пен аудандық сайлау комиссиясының төрағасы Сержан Қалқаманұлы жастардың сайлау үдерісіндегі рөлі туралы мазмұнды баяндамалар жасады.
Шара барысында аудандық мәдениет үйінің әншілері Ақжан Мамбетәлиев пен Қасымжан Саденов әннен шашу шашып, форумға ерекше көңіл-күй сыйлады.
Жастар саясаты бағытында тәжірибе бөліскендер:
• Мади Күнту – Жастар ресурстық орталығының директоры
• Әсел Дүйсекеева – «Нұр-Бала» орталығының жетекшісі
• Айғаным Серикова – аудан әкімдігі аппаратының инспекторы
Форумда аудан мектептерінің үздік мектеп парламенттері де өз жобаларын таныстырып, тың бастамаларымен көзге түсті. Жамбыл мектеп-гимназиясы парламентінің ән шашуы көрермендердің ыстық ықыласына ие болды.
Шара соңында Мойынқұм аудандық аумақтық сайлау комиссиясының төрағасы Сержан Қалқаманұлы бірқатар мектеп парламенттерін Алғыс хатпен марапаттады. Олардың қатарында:
– Жамбыл атындағы мектеп-гимназиясы
– М.Жұмабаев атындағы мектеп-лицейі
– Т.Рысқұлов атындағы тірек мектебі
Форум аяқталған соң қатысушылар шағын сауалнама толтырып, өз пікірлерін білдірді. Ұйымдастырушылар жастардың белсенділігіне ризашылықтарын жеткізді.
Жас сайлаушылардың алғашқы форумы жоғары деңгейде өтіп, аудан жастарының азаматтық ұстанымын нығайтуға айтарлықтай серпін берді.
Шара естелік фотосессиямен қорытындыланды.