Жазасын өтеушілердің денсаулығы – тұрақты бақылауда
Қазақстан Республикасының әр азаматы тегін медициналық тексерістен өтуге құқылы. Бұл қатардан түзеу мекемелерінде жазасын өтеп жатқан азаматтар да шет қалып жатқан жоқ. Мәселен, күні кеше Жамбыл облысы бойынша Қылмыстық-атқару жүйесі департаментіне бағынысты №25 мекемесінде жазасын өтеп жатқан азаматтар толықтай дәрігерлердің қарауынан өтті.
Сотталғандардың денсаулық жағдайын қарауға Тараз қалалық №5 емхананың дәрігерлері келіп, жазасын өтеушілерді тексерістен өткізді. Аталған шараға облыс әкісінің орынбасары Айжан Есмағамбетова, Жамбыл облысы прокуратурасынан – Асылбек Пешеков, Сәкен Маратұлы, Эльдар Баймешов және Жамбыл облысы бойынша Қылмыстық-атқару жүйесі департаменті бастығының орынбасары Қанат Сматов арнайы қатысты.
