Жергілікті құқық қорғау органдары аталған фактіні растап, қазіргі уақытта оқиғаның мән-жайын анықтау мақсатында арнайы тексеру амалдарын жүргізіп жатыр. Бұл соңғы бірнеше ай ішінде өңірде тіркелген осыған ұқсас бесінші жағдай болып отыр.
Полиция департаменті табылған нысанның елді мекендерден тыс жерге құлағанын, соның арқасында зардап шеккендер мен қираулардың болмағанын нақтылады. Бұған дейін дрондардың сынықтары облыстың Бөкей ордасы, Тасқала және Жәнібек аудандарының аумағынан табылған болатын. Құзырлы органдардың мәліметінше, аймақта мұндай олжалардың жиілеуі белгілі бір себептермен байланысты.
ҚР Қорғаныс министрлігі бұл жағдайға қатысты ресми түсініктеме берді. Ведомство мамандарының айтуынша, табылған фрагменттердің басым бөлігі Ресей Федерациясының сынақ полигоны қызметінің салдары болып табылады. Аталған полигонның шекарасы Батыс Қазақстан облысының бірнеше ауданы арқылы өтетіндіктен, сынақ кезінде аппарат бөлшектерінің шекаралас аумақтарға түсуі жиілеп кеткен.
Қазіргі уақытта Ақжайық ауданында табылған нысан сараптамаға жіберілді. Мамандар құлаған аппараттың түрін және оның қайдан ұшып келгенін нақты анықтағаннан кейін қосымша ақпарат жариялайтындарын мәлімдеді. Жергілікті билік тұрғындарды абыржымауға және күмәнді заттар тапқан жағдайда бірден тиісті қызметтерге хабарласуға шақырады.
фото: ашық дереккөздерден