АҚШ президенті Дональд Трамп Вашингтондағы ұшақ апатынан ешкім аман қалмағанын растады, — деп хабарлайды Massaget.kz тілшісі.
Американдық көшбасшы бейсенбіде Ақ үйде өткен баспасөз мәслихатында сөз сөйледі.
«Өкінішке қарай, аман қалғандар жоқ», — деді ол.
Бұл Америка халқы үшін қайғы-қасірет сағаты деп атап өтті президент.
«Біз бұл апатқа не себеп болғанын білмейміз, бірақ бізде болжамдар бар», — деді Трамп.
Бұған дейін Қорғаныс министрі Пит Хегсет жолаушылар ұшағымен соқтығысқан әскери тікұшақты түнгі көру көзілдірігімен жұмыс істейтін «өте тәжірибелі экипаж» басқарғанын айтқан.
Пентагон апатқа ұшыраған тікұшақ кіретін бөлімшенің рейстерін 48 сағатқа тоқтата тұруды бұйырды.
Бейне хабарламада Хегсет Вирджиния штатындағы Форт-Белвуарда орналасқан 12-ші авиациялық батальоннан үш адамнан тұратын экипажы бар тікұшақ жыл сайынғы жаттығу рейсін орындағанын айтты.
Еске салайық, 30 қаңтарда Вашингтонда American Airlines ұшағы мен әскери тікұшақ соқтығысты. Соқтығысу Потомак өзенінің жанында болды. Ұшақ бортында 60 жолаушы мен 4 экипаж мүшесі болды. Соңғы мәліметтер бойынша, құтқарушылар өзеннен қаза тапқандардың 30-дан астам денесін алып шыққан. Іздеу-құтқару жұмыстары жалғасып жатыр, 300-ге жуық маман жұмылдырылды. Соқтығысудың себептері анықталып жатыр.
https://massaget.kz/news/tramp-vashingtondagyi-ushak-apatyina-baylanyistyi-undeu-124700/?fbclid=IwY2xjawII2UdleHRuA2FlbQIxMQABHRdyL8uy00zCC1v3MkLDQzYzObNb9AEyoscATDZ6x8cKk-jC8m2aHjczng_aem_7N3wmraNDU-SO47SmMb7Ww
Фото: Видео кадры