Депутат Жанарбек Әшімжан TikTok жастарға кері әсер етіп жатқанын айтып, оны шектеуді ұсынды, — деп хабарлайды Massaget.kz тілшісі.
«TikTok-ты айтсақ, өлі тыныштық»
«Бүгінгі таңда балалардың әліппесі – әлеуметтік желі, емізігі – TikTok, бесік жыры – Instagram десек артық болмас. Адамзат баласын отырғызып-тұрғызған осы құбылыстардың әсері әсірелеп айтсақ атом бомбасынан кем болмай тұр. Былтыр әріптесім Ерлан Сайыров TikTok платформасының қоғамдағы кері әсері туралы тиісті орындарға дабыл қағып еді, селт еткен жан жоқ. Сенатор әріптесіміз Нұртөре Жүсіп «бұрын балалаларды «тәк-тәкпен» тәрбиелейтін едік, қазір TikTok-пен тәрбиелеп жатырмыз» деп еді мінбеден. Өлі тыныштық», — деді ол.
Статистика не дейді?
Депутаттың сөзінше, кейінгі екі жылда 14,1 млн. қазақстандық TikTok желісіне тіркелген.
«Құмар ойындарды жарнамалау, стримдер арқылы әдепсіз әрекеттер көрсету, боғауыз сөздер, порнография, суицидке шақыру, діни уағыздардың оңды-солды таралуы, буллинг, тыйым салынған заттардың жарнамасы секілді теріс әрекеттерге шақыратын лас ақпараттар осы TikTok арқылы тарап жатыр. Жасөспірімдердің TikTok-тан көргенін қайталап, жағымсыз қылық пен әдепсіз іске үйір болып бара жатқаны да жасырын емес», — деді депутат.
Жанарбек Әшімжанның айтуынша, «Мысық серуені» деп аталатын челленджді мыңдаған жас қайталаған. Подиум моделіндей көшеде өтіп бара жатқан адамдардың алдында жүретін челлендждің қаралымы 500 миллионнан асқан.
Әлем елдерінің тәжірибесі
Депутат қазір ұрпақ тәрбиесімен тікелей әлеуметтік желілер айналысып отырғанына алаңдаулы.
«Осыны ескеріп әлем елдері мұның одан әрі етек алуына жол бермеу мақсатында TikTok-қа шектеу қою немесе ондағы контентке бақылауды күшейтуді қолға алып отыр», — дейді депутат.
Жанарбек Әшімжан Ресей, Қырғызстан, Өзбекстан, Тәжікстан елдері TikTok желісіне ішінара немесе толық шектеу қойғанын, Франция үкіметі жасөспірімдердің интернетке қолжетімділігін заңнамалық деңгейде реттегенін мәлімдеді. Аустралия 16 жасқа дейінгі балаларға қолдануды заңмен шектеді. Еуропалық Одақ, Канада, Ұлыбритания, Жаңа Зеландияда балалар қауіпсіздігіне қатысты алаңдаушылыққа байланысты 2023 жылы шешім қабылдаған.
«Керек десеңіз, TikTok-тың атасы саналатын Қытайдың өзінде бұл платформа қолжетімді емес. Біз де жеделдетіп TikTok-қа шектеу қою мәселесін қарастырғанымыз жөн. Өйткені TikTok-ты шамадан тыс қолданудың психологиялық әлеуметтік және академиялық салдары, баланың санасы мен денсаулығына кері әсері аз емес. Тіпті офтальмолог дәрігерлер телефонға телмірген балалардың арасында кейінгі бес жылда көз ауруы күрт көбейіп кеткенін айтады», — деді ол.
Депутат Үкіметке мына шараларды қолға алуды ұсынды:
- TikTok-тағы әдепке, ұлттық құндылықтарға, дәстүріміз бен салтымызға қайшы келетін, балалардың санасын улайтын, теріс әдеттерге шақыратын барлық контентке шектеу қою;
- Елімізде TikTok-ты кәмелеттік жасқа толмаған балалардың пайдалануына қатаң шектеу қою немесе мүлдем тыйым салу тетіктерін қарастыру керек.
Еске салайық, бұған дейін сенатор Геннадий Шиповских те TikTok платформасын бұғаттауды ұсынды.
https://massaget.kz/news/TikTok-tyi-shekteu-kerek-deputattar-tagyi-da-dabyil-kaktyi—125436/?fbclid=IwY2xjawIil_RleHRuA2FlbQIxMAABHbFuvPvA66ka0sF3BraeNEY5_emI5RBaGdZ_Lb96NYMAydFL63CPT5pOPA_aem_d4pfhDolbZb7kpM28HoN2Q
Фото: parlam.kz