Сарысу ауданында археологиялық зерттеулерге қатысатын волонтерлер үшін арнайы оқу-семинар ұйымдастырылды. Бұл дайындық «Ақтоғай» үңгірінде жоспарланған ғылыми қазба жұмыстарына қатысушылардың біліктілігін арттыруға бағытталған.
Жамбыл облыстық тарихи-мәдени ескерткіштерді қорғау және қалпына келтіру дирекциясының бастамасымен өткен кездесуде тараптар ынтымақтастық форматын анықтап, оқыту бағдарламасын бекітті.
Оқыту барысында қатысушыларға «Археологиялық зерттеу әдістері және далалық күнделік жүргізу» тақырыбында практикалық сабақ өткізілді. Семинардың мақсаты — болашақ зерттеу тобына археологиядағы далалық жұмыстардың негізгі қағидаларын, артефактілерді тіркеу тәртібін, өлшем алу әдістерін және далалық белгілерді қою ережелерін үйрету.
Волонтерлер арнайы үлгі-дефтермен жұмыс істеп, ғылыми күнделік толтырудың талаптарын тәжірибе арқылы меңгерді. Сонымен қатар, қазба алаңының құрылымы, картаға белгілеу, топырақ қабаттарын кезең-кезеңімен тіркеу сияқты кәсіби дағдылар түсіндірілді.
Семинарға шақырылған археолог-өлкетанушы Сауран Қалиұлы тарихи ескерткіштермен жұмыс істеу кезінде сақталуы қажет этика, жауапкершілік және тарихи құндылықтарды қорғау мәдениеті туралы айтты.
-Әр қабат — уақыттың ізі, әр белгі — тарихтың даусы. Біз оны дұрыс жазбасақ, ол үн қайтадан жоғалады, — деді ол.
Оқыту қорытындысында волонтерлер алдағы маусымда өтетін далалық қазба жұмыстарына қатысуға дайын екенін білдірді. Ұйымдастырушылардың айтуынша, мұндай форматтағы дайындық өңірдегі археологиялық жобаларға жаңа тәжірибелі жастарды тартуға мүмкіндік береді.