2023 жылдың 30 қаңтар күні Қордай ауданында басталған этносаралық келісім мен бірлікті нығайтуға бағытталған кешенді шаралар жалғасуда.
7 ақпанға дейін жалғасатын шаралар қатарында мемлекеттік тілдің қолданыс аясын кеңейту, қазақ тілінің этносаралық қарым-қатынас тілі ретіндегі қызметін нығайту, мемлекеттік тілді меңгерген қоғамдық белсенді өзге этнос өкілдерін ынталандыру мақсатындағы шараларға басымдық берілген.
Осы мақсаттағы шаралар қатары 02 ақпан күні Сортөбе ауылында ұйымдастырылды. Мәселен, округтегі аралас мектеп оқушылары «Атадан қалған асыл сөз» тақырыбында қазақ халқының мақал-мәтелдері мен даналық сөздеріне шолу жасап, туған жер, тіл, достық, бірлік туралы мақал-мәтелдер мен ұлы тұлғалардың даналық сөздерін жатқа айтты.
Сондай-ақ, Сортөбе ауылындағы М.Лермонтов атындағы №16 орта мектебінде Масаншы, Сортөбе ауылдарындағы мектеп директорлары мен балабақша меңгерушілері арасында «Мен қазақша сөйлеймін» байқауы өтсе, №50 орта мектепте «Бір – Отан, бір – тіл, Тәуелсіз ел» атты тақырыбында өткен кездесуге мемлекеттік тілді жетік меңгерген өзге ұлт өкілдері қатысып, ой талқы алаңын ұйымдастырды. Аталған шараларға Жамбыл облысы әкімдігі тілдерді дамыту басқармасының басшысы Р.Тұрмаханбетова мен аудан әкімінің орынбасары Д.Сүгірбай арнайы қатысты.
Айта кетейік, қазіргі кезде Қордайда қазақ тілін үйренуге ниет білдірген өзге этнос өкілдерінің қатары көбейіп келеді. Тисінше аудан тұрғындарының мемлекеттік тілді меңгеру көрсеткіші артқан. 2022 жылдың 12 айында жалпы 82 топ, 992 тыңдаушы оқуға қамтылса, 2023 жылдың қаңтар айында ашылған топтардың саны 25 топ, 293 тыңдаушы. Жалпы 1037 тыңдаушы бар.
Сондай-ақ, аудан, ауыл тұрғындарына қазақ тілінің қарапайым деңгейін QAZOHLINE мобильді қосымшасы арқылы, «Отбасында қазақ тілін бірге үйренейік!» сөздігі, ақпараттық және жарнамалық парақшалар, 56 түрлі оқулық таратылып, түсіндіру жұмыстары жүргізілді.