Сот қорытындысы бойынша оған өмір бойына бас бостандығынан айыру жазасы тағайындалды.
Футбол клубның 30 жастағы менеджеріне Қылмыстық кодекстің екі бабы бойынша (сексуалдық сипаттағы зорлық-зомбылық әрекеттері және есірткі қолдануға итермелеу) айып тағылды. Біріншісі бойынша, ол бүкіл өмірін түрмеде өткізуге мәжбүр болады.
– Қылмыстық кодекстің 121-бабының 4-бөлігі бойынша өмір бойы бас бостандығынан айыру және педагогикалық қызметпен, кәмелетке толмағандармен байланысты лауазымдарды атқару құқығынан өмір бойына айыру жазасы тағайындалсын.
– Қылмыстық кодекстің 299-бабының 3-бөлігінің 1 және 2-тармақтары бойынша сегіз жылға бас бостандығынан айыру. Қорытынды жаза ретінде өмір бойына бас бостандығынан айыру тағайындалсын, – деп жариялады сот Құдабай Сұлтанов.
Ер адам жазасын қылмыстық-атқару жүйесінің төтенше қауіпсіз мекемесінде өтейтін болады. Жәбірленуші тарап сондай-ақ үш миллион теңге көлемінде талап-арыз берді.
Айта кетейік, өткен жылдың 1 қыркүйегінде клуб менеджері алаяқтық жолмен 10 жастағы қызды қонақүйге алып барып, оны әкімшіге қарындасы ретінде таныстырған. Іс материалдарынан белгілі болғандай, бұған дейін павлодарлық азамат танысымен кездесіп, ішімдік ішкен, кейін психотроптық заттар қолданған. Қонақүй бөлмесіне қалай түскені есінде жоқ. Есін жиғанда өзінің майка мен шалбарда, ал баланың футболка мен шалбарсыз екенін байқаған.
Тергеу барысында қыз педагог-психологқа қатты қорыққандықтан айғайлай алмағанын, жылағанын, ал ер адамның оның аузын қолымен жауып ұстағанын айтып берген. Сондықтан бөлмеден ешқандай айғай-шу естілмеген. Бөлмеде менеджер тек өзі мефедрон қолданып қоймай, сонымен қатар психотроптық затты қыздың мұрнына күштеп сепкен, осының салдарынан қыздың жағдайы нашарлаған.
Үкім заңды күшіне енген жоқ.
фото: istockphoto.com
https://turkystan.kz/article/254966-esirtki-bergen-pavlodarda-okushyny-zorlagan-futbol-menedzheri-sottaldy