Қазақстанның бірінші, әлемнің 10-ракеткасы Елена Рыбакина АҚШ-та өтіп жатқан Индиан-Уэллс WTA 1000 турнирінің жартылай финалына шықты деп хабарлады turkystan.kz.
Қазақстандық теннисші ширек финалда әлемнің 76-ракеткасы, чехиялық Каролина Муховамен ойнады.
Қарсыластар осыған дейін 2019 жылы АҚШ ашық чемпионатында кездесіп, онда чехиялық спортшы 6:4, 6:4 есебімен басым түскен еді.
Бұл жолы бірінші партияда К.Мухова брейк жасап, 4:2 есебімен алға кетті. Бірақ ол сетке доп бергенде, Елена таразы басын теңестірді – 5:5. Сосын тай-брейкте сәтті өнер көрсетті – 7:6 (7:4).
Екінші сетті Мухова брейкпен бастады – 2:0. Содан кейін тағы бір брейкпен бітірді – 6:2.
Үшінші, шешуші партияда Е.Рыбакина брейкпен алға кетті – 3:1. Есеп 5:3 болған мезетте Елена екі матчболды пайдалана алмады. Дегенмен өзі доп бергенде, есесін жіберген жоқ – 6:4.
Екі сағат 46 минутқа созылған тартысты матч барысында қазақстандық спортшы 6 эйс жасап, 14 брейк-пойнттың екеуін өз есебіне жазды. Қарсыласы 1 эйс, 3 брейкпен (6 брейк-пойнт) көзге түсті.
Елена Рыбакина финалға шығу үшін әлемнің 1-ракеткасы, Польша өкілі Ига Швентек немесе рейтингте 83-сатыдағы румыниялық Сорана Кырстяның біреуімен таласады.
https://turkystan.kz/article/217214-elena-rybakina-aksh-tagy-turnirdin-zhartylay-finalyna-shykty/