Жамбыл облысы әкімдігінің дін істері басқармасының ұйымдастыруымен өңірде дін саласында қызмет атқаратын мамандарға арналған екі күндік оқыту семинары өтті. Аталған шараның негізгі мақсаты – сала қызметкерлерінің кәсіби біліктілігін арттыру, аймақта діни ахуалдың тұрақтылығын қамтамасыз ету және өзекті мәселелерді талқылау.
Семинар барысында қатысушыларға дін саласындағы мемлекеттік саясаттың негізгі бағыттары, діни бірлестіктермен жұмыс жүргізудің тиімді тәсілдері, сондай-ақ экстремизм мен радикализмнің алдын алу жолдары кеңінен түсіндірілді. ҚР Президенті жанындағы МБА Мемлекеттік саясаттың ұлттық мектебінің директоры, Әлеуметтану ғылымдарының кандидаты, дін саласындағы республикалық ақпараттық- түсіндіру тобының мүшесі Талғат Жақиянов, «Нұр -Мүбарак» ЕИМУ Діни экстремизмге қарсы іс-қимыл орталығының директоры Қонай Халым, журналист-блогер Мөлдір Анарбаева, республикалық «Тәжірибелік психология» қоғамдық бірлестігінің төрайымы Фатима Бизақова сияқты мамандар мен сарапшылар өз баяндамаларын ұсынып, практикалық кеңестерімен бөлісті.
Оқыту бағдарламасы теориялық және тәжірибелік бөлімдерден тұрып, қатысушылардың белсенділігін арттыруға бағытталды. Топтық талқылаулар, сұрақ-жауап сессиялары ұйымдастырылып, нақты жағдайлар негізінде кейстер қарастырылды. Бұл өз кезегінде мамандардың кәсіби дағдыларын жетілдіруге мүмкіндік берді.Сонымен қатар, семинарда қоғамдағы діни тұрақтылықты сақтау, жастар арасында дұрыс діни көзқарас қалыптастыру және ақпараттық-түсіндіру жұмыстарын жетілдіру мәселелері де назардан тыс қалмады.
Мамандардың айтуынша, мұндай оқыту шаралары сала қызметкерлерінің біліктілігін арттырып қана қоймай, тәжірибе алмасуға және өзара ынтымақтастықты нығайтуға ықпал етеді.
Екі күнге созылған семинар өз мақсатына жетіп, қатысушылар үшін пайдалы әрі мазмұнды алаңға айналды.
Талас ауданы