Мемлекет басшысы Қасым-Жомарт Тоқаев Ұлттық құрылтайда Әділетті Қазақстан құру кезеңінде ұлттың жаңа сапасын қалыптастыру үшін қоғамдағы жағымсыз әдеттерден аулақ болуды ұсынды. Ұлттың жаңа сапасын қалыптастыру жолындағы өте маңызды құрал» деп жас ұрпаққа тәрбие беру жұмысын күшейтуді, олардың бойына адами құндылықтар мен қасиеттерді сіңіруді тапсырды.
Осы орайда бүгін аудандық білім бөлімінің және аудандық прокуратураның ұйымдастыруымен «Балалардың қауіпсіздігі – ұрпақ болашағының кепілі» атты аудандық форум өтті. Шараға аудан әкімінің орынбасары Ерлан Ермағанбетов, аудан прокуроры Елдос Әмірхан, аудандық полиция бөлімінің өкілдері, сондай-ақ ауыл әкімдері, ардагерлер кеңесінің төрағалары мен ардагер ұстаздар, білім беру ұйымдарының басшылары және ата-аналар қатысты.
Шарада сөз алған аудан прокуроры Елдос Тұрғынбайұлы: — Еліміздің айқын мақсаттарының бірі – бәсекеге қабілетті жас ұрпақты жан-жақты жетілген, парасатты азамат етіп тәрбиелеу, еліміздің ертеңгі ұлт тізгінін ұстар жастарымыздың тәрбиесіне аса мән беру – біздің негізгі мақсатымыз, — деп жастар тәрбиесіне тоқталды. Мұнан соң аудан әкімінің орынбасары Ерлан Дайрабайұлы сөз сөйлеп, ұлттық тәрбиені қалыптастыруда жан — жақты жұмыстар жасалу қажеттігін айтты.
Форумда сондай — ақ, Республикалық «Сенімен Болашақ» ата-аналар қоғамдық бірлестігінің Жамбыл облысы бойынша филиалының сарапшысы Баян Айткалиқызы, аудандық білім бөлімінің басшысы Жуаныш Жарықбасов сөз сөйлеп, кәмелет жасқа толмаған балалардың құқығын қорғау, оларға қолдау көрсету — басты мақсат екендігін жеткізді.
Аудандық білім бөлімінің әдіскері Бекзада Жұмағұлова психологиялық тренинг жүргізсе,Балтабай Адамбаев атындағы тірек орта мектебінің 10 сынып оқушысы, республикалық пән олимпиадасының ІІ орын жеңімпазы Тоғжан Мамыр, Байқадам Қашқынбаев атындағы орта мектебінің 10 сынып оқушысы, Әлем чемпионатында каратэден әлем чемпионы Думан Ердешбаев және Б.Қашқынбаев атындағы мектеп жанындағы интернат тәрбиеленушісі, 7 — сынып оқушысы Әсем Дөрменбек те сөз сөйлеп, замандастарын озық ойлы, білімді болуға шақырды.
Шара концерттік бағдарламаға ұласып, балалар шығармашылық орталығының бишілері мың бұрала билесе, Жайылма өнер мектебінің ұстаздары Қолқанат Қойгелдиева мен Жайық Адамбаев әннен шашу шашты. Оркестрдің орындауындағы Халық күйі “Жайма қоңыр” мен Шолпан Қорғанбектің “ Арнау» туындылары көрермендерді бір серпілтіп тастады.